Kosi Songbad-ko bikotchenggipa R. Marwein-ni siani skanggipa salko gisik ra•anga

Tura, June 11,2022: Meghalaya a•dokni koborrangko separakna, a•dokni pilak jatrangni koborrangko ma•sigrikachi sepanggrikatna aro duk a•sel ong•ani somoio dakchakgrikna miksonge Readington Marwein sagi “Kosi Songbad” ko 2020 bilsini October jao kulie on•angaha. Ua “U Mawphor” aro “Highland Post” ni Publisher-ba ong•achim.

Indake uni skanggipa siani bilsisa gapaniko gisik ra•e, Sukrobar salo uni “Death Anniversary”-ko East Khasi Hills a•jani Mawiong Rim-o maniangaha.
Uko gisik ra•ani gita ong•atgipa tom•anio, Meghalaya Editors and Publishers Association (MEPA)-ni ka•rimskarang, sianggipa nokdangni manderang, ‘U-Mawphor ‘ aro ‘Highland Post’-ni ka•rimskarang, Mari Bon Marwein Skulni ka•rimskarang bakko ra•angtokaha. Indake ia tom•anio sianggipa Readington Marwein-ni nama kamrangko jinmana aganprake on•angaha.
Indake Meghalaya a•doko 1964 bilsioni songbad-rangko palenggipa saksa Devin Kharsyntiew-naba “Readington Memorial Award”-ko mande ra•e on•angaha.
Readington Marwein 2021 bilsini June 10 tariko Covid-19 sabisini a•selo an•tangni ka•sagipa jik dedrang aro ka•rimskarangko wate jringjrotna neng•takram biapona re•angaha.