Tura, June 10, 2022: Garo Students Union (GSU) Western Zone Dadenggre Meghalaya State Watershed and Wasteland Development Agency (MSWSWDA)-ni Field Engineer-na seokaniko raken jegalataha.
“MSWSWDA Department-ni Officer-rang, Field Engineer-ni kamna mande seokani bewalko jegala. Garo Hills-ni bang•a kangal cholgri manderang kamna gale nipagenchimoba, Shillong songjinmaosa interview-ko ra•na re•angna nangahaon tangka paisa dongjae neng•nikaniko man•a. Bang•a changon Garo Hills-ni manderang tangka paisani a•selo interview-rangko ra•na man•rongja. Uamang re•bae interview-rangko on•genchimoba, uamangni aganchakanirang chu•ongja ine kamo rakkija. Indide Garo Hills-o poraigipa bi•sarang jemangan Shillong songjinmachi kamni interview-ko on•na re•angrongachim, indiba uamangni bidade kamo rakkina chu•ongjama? MSWSWDA Department-ni Field Engineer-na seokanio, Garo Hills-ni A•chik saksaba dongja. A•chik jatni Certificate ba Diploma-de gamchatjama? Ia kamna bang•a A•chikrang galrikpaachim aro Interview on•na re•angachim, indiba uamangni bimingrang waiting listo mangmangba nakatja. Meghalaya Tribal jatni a•dokara batchi gimajok? Meghalaya sorkariara State Reservation Policy-ko ja•rikbebeengama? Ia obostani bidingo sorkari aro Department changsatai nipiltaina nangchongmota. Result-ko parakatgipa Department-ni manderang, sing•sandia matchotkuja dipet seokako man•gipa manderangna Appointment letter-ko on•na nanga” ine GSU WZ, Dadenggre-ni President Tengsan Marak dabiangaha.