Nongpoh, April 13: A•doko niam gri koila salgipa truck bolsa Monggolbar pringo Ri Bhoi a•jani Umling buring sepango tu•begipa a•kuangchi ga•akonangaha ine koborko man•soaha. Koborni gitade, truck garini registration number ML-07B-9154, West Khasi Hills-oni Umrit-Umling rama gita pulis checking-oni gele jokna ta•rakprete salangani a•sel a•kuangchi ga•akangaha.
Ia a•sel ong•aniko a•ba gamgiparang aro songni manderang ta•raken kobor on•ataha. Indake songni manderang a•sel ong•gipa biapona chawatange saknaa man•gipa truck driver-ko dakchakaha aro sanna gita hospital-ona ra•angaha.
Indake a•kuangchi ga•akange nosto ong•gipa truck gariko saldoaha aro niam gri koila salani bidingo sandienba niam gita dingtang dingtang section-rango pangchake ong•gimin a•selko jako ra•anggen ine Ri Bhoi a•jani Superintendent of Police (SP), Giri Prasad, u•iataha.
A•doko niam gri koila cho•anirang aro salanirang batroroengani gimin da•alo indakgipa a•sel ong•taiaha, iani bidingo bil gnanggipa manderang chanchina nangao ga•aka. Mikkangchi indake niam gri koila cho•ani aro salanirangko nie dongode, a•sel ong•anirang batrorogen, uni gimin sorkari iani bidingo maiba champengataniko dakjawama? ine sing•doangaha.