Tura, Feb 1, 2023: Congress-ni senior dilgipa aro Kharkutta-ni gitcham MLA Omelo K.Sangma aro uni ka•rimskarang bang•a party-ni membor-rang baksa Tura-ni MDC aro BJP State Vice President Bernard N.Marak, Assam Legislative Assembly-ni Deputy Speaker Dr Numal Momin aro BJP Tura City District dilgiparangni dongpanio Tura BJP office-ona re•bae BJP dolo napeaha.
Omelo Sangma-ni agana gitade, ru•uta bilsirangna Congress party-o donge organised ka•aha, indiba Congress party a•songna bang•a corruption-ko ra•baha. Uni gimin, “Anga a•songo corruption-ko ra•bagipa party-o donge maming namgniko ra•bana man•jawa ine nikenba, badia party-o kam ka•ode, a•songni corruption-ko namatna man•gen uko baseaha, indake a•songni coruption-ko bon•atna man•gipa BJP-ni dilgiparang aro a•songni Prime Minister Narendra Modi aro Amit Shah-na agre darangba dongja ine nikaha” ine Omelo Sangma aganaha.
Iandakgipa obostarangko Congress party-o chagrongani giminsa anga da•alo Congress-oni ong•kate, BJP dolo napaha ineba Omelo Sangma aganaha.