Tura, November 22, 2022: Bharatiya Janata Party (BJP) Tura District Committee-ni District General Secretary Wilver M Danggo, “Chinga District Committee-ni gita John Leslee Sangmako eleksino BJP-ni candidate ong•e chakatna seokja. Ua BJP dolo donge kimkim ong•e kam ka•gipa membor ong•ja. Chinga District Committee-ni membor-rang uni chakatna am•engani gimin u•ija aro ua changsaba BJP office-ona re•bae ticketni bidingo agangolpoa dongja. Ua pangnan dolni tom•anioba bak ra•rongja aro office-onaba re•bae obostarangko agangolpoa dongja” ine janapataha.
Tura City District Committee-ni membor-rang, John Leslee Sangma-ni candidate ong•e BJP doloni susana am•ani bidingo maming kobor dongja. Ua an•tangni chakatna sikaniko darang membor-na paraka dongja. Uni gimin indake tol•gipa koborko manderangna gipataniara kraani ong•ja aro dolni dongimin niamko pe•a gita ong•a. Bernard N Marak maming saloba an•tangko candidate ine aganja, indiba ua karyakarta ong•e an•tangni BJP dolko bilakdapatna rake kamko ka•enga. John Leslee Sangma-ba BJP dolni candidate ong•e chakatna sikgenchimode, karyakarta ong•e kamko ka•na nanggen ineba ua parakataha.
“John Leslee Sangma South Tura elakkani MLA candidate ine parakna skang South Tura Mandal Committee-ni membor-rang baksa agan golpogrika dongja. Uni ku•watgimin kattara jinmako jajaaniona ra•baaha. Chinga uni an•tangko BJP dolni candidate ine manderangna parake jinmako dilsretani kamko raken jegala” ineba Danggo koborna parakataha.