Ampati, September 20, 2022: Garo Students’ Union (GSU) Western Zone (South) Ampati, South West Garo Hills a•jani Deputy Commissioner aro Excise Department-ni Chairman-na August 19 tariko lekka sedoatenba a•jao gital bonded warehouse aro chu dokkanrangko kulina miksonganiko raken jegalataha.
GSU-WZ-ni President Salman D.Sangma-ni u•iatani gitade, Ampati bajar, Betasing bajar, Harigaon, Garodoba, Zikzak, Kalaichar bajar, Mahendraganj, Kalaipara, Salmanpara, Ampati pulis bajar, Garobadha, Mirjumla, Damalgre aro Monabari jolrango gital kulina am•enggipa bonded Warehouse aro chu dokkanrangko songni manderang rake jegalataha.
SWGH a•jao chu•onga gita Bonded Warehouse aro chu dokkanrang gnang, uni gisepon gital warehouse aro chu dokkanrangko kulidapna miksonganiko songni manderang jegalattokaha. Uni gimin manderangni namgnina aro uamangni jegalaniko knachake gital Licence-na Registration ka•aniko ra•chakna nangja ine Salman D Sangma didiataha.
GSU-WZ-ni u•iatani gitade, songni manderang, Nokmarang aro NGO-rangni, No Objection Certificate (NOC)-ko ra•chenggija gital licence-na Register ka•enggipa manderang bang•en donga ineba janapataha.
“Chinga a•jao dolsa gitchambatsranggipa Organization ong•a, SWGH a•jani ning•o gital bonded warehouse aro chu dokkanrangko kulidapna miksonganiko raken jegala” ine Salman Sangma janapataha.