Tura, September 20, 2022: A•chik Holistic Awakening Movement (AHAM) Bolori Regional Unit, West Garo Hills a•jani Deputy Commissioner-na Sombar salo lekka sedoatenba, Adugiri-oni Purakhasia-ona aro uni wilwilao donggipa songni manderang rama namsrangjani gimin re•a doanio namen neng•nikanirangko man•enga ine janapataha aro ta•rake ia ramako tarie on•china DC-ko mol•molangaha.
AHAM Bolori Regional Unit-ni President Sojendro D.Sangma-ni janapatani gitade, re•anggipa 2018-19 bilsirango Bharat Nirman Pradhan Mantri Gram Sadak Yojana (BNPMGSY), Adugiri-oni Purakhasia-ona km 1200-oni km 2800-ona (L-1600) CC road-ko tarina gita tangkarangko on•ataha, indiba ia ramako da•onaba tarikuja. Indake 2020-21 bilsio ia apsan ramako tarina gita Tura Fancy Valley-o donggipa saksa Bimal Kumar Agarwala-na contract on•aha aro kam ka•anirangko nirokna Public Works Department (PWD)-ko donaha, indiba uamang kamrangko ka•gija aro nirokgija galchipe donaha ine janapataha.
Ia ramako bang•a songni manderang salantio re•ruraenga aro Tura-ona re•ani ian mongsonggipa rama ong•a. Salantio kam nangani gimin re•ruraenggipa manderang bang•a neng•nikanirangko man•enga. Uni gimin ia ramako ta•rake songni nokni namgnina taripile on•chia AHAM Bolori Regional Unit dabiangaha.