Tura, Sept 20, 2022: A•chik Youths Cultural Society (AYCS) dolsa NGO, GHADC-ni Chief Executive Member (CEM) Pa Albinush R Marak-ni kamko jegalataha.
AYCS-ni President Anthony Ch.Marak-ni u•iatani gitade, GHADC-ni CEM Pa Albinush R.Marak Council-ni kamrango mikkang nitee kam ka•enga ine matnangatenba GHADC Office General Branch-ni sakgni manderang gipinni man•na nanggipa tangkako oke cha•aha ine parakataha.
GHADC-ni CEM bang•a manderangko an•tangni chamber-o napna gita on•ja aro apsandake uni Personal Assistant (PA)-rang bang•a changon, manderangko napna on•jaenga ineba matnangataha.
CEM-ko grongna gita bang•a manderang dingtang dingtang kam nangani gimin re•angiparangko napna on•jaenga. Iasan ong•aigija CEM-ni Chamber-o pangnan EC meeting ka•e, manderangko ru•uta somoina sengate, salsani kamko salgittam, salbri basakoba antisarang ong•ate donenga ineba janapataha.
“CEM-ni asongchakram biapara EC-rangni meeting ka•ram biapsama ine, anga CEM-ko sing•dona sika, maina chel•a biaprangoni re•bagipa manderang salgimik grongna sengoba man•rongja, ua an•tangni manderangkosan grongna on•aia, uni gimin CEM jatna kam ka•e on•na sikjaode, an•tangni chokkiko wate on•bo. An•tangni Chokkiko wate on•na sikjaode, manderangni namgnina darangkoba mikkang nigija kamrangko ka•na nanga” ineba Anthony Marak dabiangaha.
Una agreba CEM-ni PA-rangko aganne skie on•na nanga, uamang an•tangtangni neng•nikaniko pangnan manderangosa galgopronga. Uni gimin manderangni neng•nikaniko ma•sichake kamrangko ka•china AYCS mol•molangaha.
GHADC-ni ning•o kam ka•engiparangko namedake nirok sandina nanga, maina batanggimin somio General Branch-ni ning•o, Sports and Cultural Society-ni file-rangko nirokengipa, Chegen Cricket Association (CCA)-na chamatgipa tangka hajal 30,000-ko okke cha•enba, process ka•gimin file-ko gimaataha ine CCA-ni General Secretary u•iataha ineba janapataha.
Uni gimin, mikkangchi gipinni man•gnirangko maming dakeba kal•akpajachina aro CEM an•tangan, iarangko nirok sandie kamrangko ka•pachina AYCS mol•molataha.