Baghmara, Mar 27, 2023: Garo Students Union (GSU) Southern Zone Baghmara, March 25 tariko Baghmara-ni gital MLA Pa Kartush R Marak-ko Shillong-o gronge, Baghmara-o chagrongenggipa bang•a neng·nikanirangko agan janapangaha.
GSU SZ-ni mongsonggipa dabianiranga, Baghmara DC Office-ko town jangchiona jitbachina, National Highway 217-ko ta•rake a·bachengatchina, Baghmara Civil Hospital-ko namdapatchina, tower line-ko sringe on·china aro matchotgija galchipe donenggipa Asokgre-oni Mindikgre-ona dakanggipa adita killomiter ramako PMGSY-o napate matchotatpachina dabiangaha.
Unbaksana, Baghmara town jolo ge·gni bolni dollongrangko ta·rake ra·gale RCC dollong rike on•china mol·molangaha.
Pa Marak, GSU-ni dabia gitan ta·rake, DC Office building-ko ra·jitchina Skotong Minister Conrad Sangma baksa agangrike kamko ka•anggen ine ku•rachakataha.
Iasan ong·aija, gipin janapgimin kamrangkoba ta•raken kam ka·na ja·ku de•enga ineba agandapataha. Uni indake namgipa aganchakanina, “Chinga kusi ong•a aro uni namgipa ja•kuko de•na miksonganiko nike mittelna sika. Uni ka·kimchae aro kang•kare kae Baghmara elakkako namroro silroroatna re·mikkanganiko chinga ma·sina gita man·a aro bang·a development-o man•na ka·dongsoenga” ine GSU Southern Zone-ni President Chuang Houser M.Sangma parakataha.
Apsandaken, GSU dilgiparang a•dokni Education Minister, Pa Rakkam A.Sangma-ko gronge, ru•uta somoirangoni janapgimin, Science aro Commerce College-ko Baghmara-o a•bachengate on•pachina mol•molangaha.
Garo Hills-o Baghmara ge•sa gitchambatgipa a•ja ong•a, indiba skie ra•ani science aro commerce college dongkuja. Uni gimin, “Chinga nangni Cabinet Minister ong•e, Education-ko jako ra•e nirokanina kusi ong•a aro mikkangchi South Garo Hills a•jao lekka parani gadang namen dingtanganiko man•chongmotgen” ine GSU dilgipa ka•donganiko parakataha.