Williamnagar, Mar 27, 2023: Garo Hills gimikni All Chada Chra United Association (ACCUA), uamangni bilsi sa gapaniko Williamnagar Kusimkolgre gittim o maniangaha.
Ia association-ko re•anggipa 2022 bilsini March 25 tarik, Williamnagar-o a•bachengataha. Indake ia association-ko a•bachengatna Garo Hills gimikni Chada Mahari chanchirimaniko dake ACCUA-ko bimangko chu•sokatna man•aha aro Williamnagar-ko head quarter dake donaha.
Indake association-ko re•dilna gita dilgiparangko seokaha. Uaranga Winston C.Marak President, Arwish C.Marak Secretary aro Rev. Instinct C.Marak Adviser.
Ia association-ni bilsisa gapaniko Sonibar salo Williamnagar Kusimkolgre-o maniangaha. Ia tom•aniona Garo Hills-ni bang•a Chada Chrarang sokbatokaha. Chra Association-ko bikotani miksongara, “Ma•giparangko chel•chakna, Noa Namchikrangko nirok sandina aro Chada Maharini A•kingko ripingna” Chra Association-ko bikotaha ine Junebirth C.Marak koborna u•iataha.
Indakgipa kamko ka•anichi A•chik jatni Niam Reti-ko ja•rikna aro A•chik a•songni Chada Maharina on•gilpaani ong•a ineba janapataha.