Baghmara, May 20, 2022: Garo Students’ Union (GSU) Silkigre Unit a•dokni Skotong Minister Conrad Sangma-na lekka sedoatenba Silkigre PHC buildingko gital rike on•china dabiangaha.
GSU Silkigre Unit-ni President Johnpikilap R.Sangma-ni janapatani gitade, South Garo Hills a•jani ning•o ga•akgipa Silkigre PHC building nok namen gitchamahani gimin mikka balwa rakode be•grunaba donga ine janapataha.
Silkigre PHC-o sanna bannaniko dakenggipa Dokdor aro Nurse-rang ia gitchamgipa building nokna salantian kenna gnang kamko ka•na nangenga. Uasan ong•ja sae ding•e hospital-o sannako man•enggipa manderangnaba kenchakani aro gisiko jajrengna ong•enga ineba janapataha.
Uni gimin ia gitcham PHC buildingko pe•gale gital buildingko rike on•genchimode songni manderangna aro wilwilao donggipa manderangna namen dakchakbeani ong•genchim ine GSU Silkigre Unit janapataha.