Tura, August 21, 2022: Garoland State Movement Committee (GSMC), HQ Tura-ni Co-Chairman, Balkarin Ch. Marak aro Additional General Secretary Bostone M. Sangma Tripura a•dokona re•ange, Tripura-o songdongenggipa Garo songrangni Garo-rangko grongeaha ine u•iataha.
Bostone Sangma-ni u•iatani gitade, Agartala-o dongenggipa A•chik songrang jekai Marakpara, Dupchora, Nagi Chora aro bang•a gipin songrangko re•ange nieaha.
Indake GSMC dilgiparang Tripura a•doko songdongenggipa A•chik songrangona re•ange niahaon, “Ua jolrango dongenggipa A•chikrang jattangni dakbewal rikbewal pilakkon gimaataha. Uamang ku•tangkon name agana man•jaha aro ganna chinanirang namen dingtangaha. Unbaksana ua jolo dongenggipa A•chikrang Bengali-rangni dakbewalrangkosa ja•riktokaiaha. Tripura a•doko songdongenggipa A•chikrang game ge•e cha•giparang aro salanti hajira kam ka•e cha•giparangan mongsongbatgipa ong•achim” ine nikna man•aha.
Uni gimin je biapo ba a•doko donggenchimoba A•chikrang jatni dakbewal rikbewal, niam retti aro ku•siktangko gualna nangja ineba GSMC dilgiparang parakataha.