Ganthur train station-o brange dongenggipa A•chik pante saksako EGH a•jani pulisrang rimbapilengaha 

0

Williamnagar, Aug 21, 2022: East Garo Hills a•jani pulisrang Andra Pradesh a•dokni Ganthur Train Station-ona Robibar salo sokeaha ine koborko man•soaha.

East Garo Hills a•jani pulisrang brange dongeggipa Williamnagar Old DC Colony gittimni bilsi 25 ong•gipa Tengrik Momin-ko Ganthur Railway Authority-rangni jakoniko songtang Williamnagar-ona rimbapilengaha ine koborna parakataha.

Koborni gitade, Tengrik Momin Company-o kam ka•na gita uni ripengskarang baksa Goa songjinmaona re•angengachim. Indiba Goa songjinmaona sokanggija Andra Pradesh a•dokni Ganthur train station-o ong•onrikenba brange dongengachim, ine uni abitang Asma Momin u•iataha.

East Garo Hills a•jani pulisrang, Ganthur Train Station-o brange dongenggipa Tengrik Momin-ni gimin Andra Pradesh, District SP-ni koborko man•soe, Andra Railway Authority-rangko simsake donsochina mol•molataha. Indake Tengrik Momin railway authority-rangni simsakanichi maming a•sel ong•a gri tom•tome songtangona re•bapilengaha ine pulisrang u•iataha.

Andra Railway Authority-rang Tengrik Momin-ko simsake donsoenba tom•tome songtangona watatpilanina, Andra Railway Authority-rangko East Garo Hills a•jani pulisrang mittelataha.

“Uni gimin manderang pangnan ching baksa bakrime, chingko dakchakbo, chingaba na•simangko dakchakgen” ine Meghalaya Pulis manderangko mol•molataha.

Leave A Reply

Your email address will not be published.