Greneth Sangma Skul Education-ni Director-na gisik ra•atpiltaiani lekkako seata  

Baghmara, June 3, 2022: South Garo Hills a•jani Social Activist Greneth M.Sangma, Budbar salo Mendikgre LP aro UP skul nokrangko gital dake riktaipile on•china Skul Education and Literacy-ni Director-na gisik ra•atpiltaiani lekkako sedoattaiaha.

Greneth Sangma-ni seatgipa chittio janapatani gitade, Mindikgre aro uni wilwilao donggipa songni manderang LP aro UP skul nokrangko gital riktaie on•jaengani a•sel skul bi•sarang neng•nikaniko man•enga. Ua skul nokrang nosto ong•e obostarang namsrangjaha aro asongchakani bench-rangba dongja, uni gimin skulo poraienggipa bi•sarangna nama sikanirangko on•pachina mol•molataha.

Batanggimin salrango ia skul nokrangko gital rike on•china changni chang lekkarangko seate u•iatahachim, indiba da•alona kingkingba department-ni bil gnanggiparang maming ja•ku de•aniko dakkuja. Ia skulrang iandakgipa oboatao ong•e dongaiode, skulo skigiparang maikai bi•sarangna skie on•gen, namen neng•nikani ong•enga. Maina skulni environment-ko dal•en nosto ka•aha aro indake bon•kamo poraienggipa bi•sarangna dal•bea gimaani ong•gnok aro mikkangchi bi•sarangni gisiko maming ka•dongani dongjawa ineba Greneth Sangma janapataha.

Uni gimin ia neng•nikanirangko bi•sarangni namgnina aro Mindikgre songni wilwilao dongenggipa song nokrangni namroroanina ta•rake ja•ku de•aniko dakenba nirokatpachina Greneth Sangma mol•molataha.