Tura, January 3, 2022: Meghalaya a•dokni Governor, Brigadier Dr. B D Mishra, Monggolbar salo West Garo Hills a•jani pilak sorkari department-ni skotong officer-rang baksa Tura Circuit House-o tom•aniko ong•ate, uamangni kam ka•anirangko nipilangaha.
Ia tom•anio, a•dokni Governor bilsi gitalni nama sikaniko sakantinan on•angaha. Unbaksana department-ni skotong ong•e, uamangni dakna nanggni kamrangko name ka•dilangchina didiangaha.
Governor sorkari officer-rangko songsalni namgnina aro a•jako tang•doatna aro silroroatna kamrangko kaangchina gitaba didiangaha.
“A•doko me•su samjakrang, be•en bitinrang aro gipin bosturang bon•changaniko dontongatna gita a•jani Officer-rang Line Department-rang baksa bakrime kamko ka•angna nanga” ineba Governor aganangaha.
Unbaksana, Garo Hills Autonomous District Council (GHADC)-ni membor-rangko gronge jatni daka rikarangko tangkame rakkina kamko ka•angchina aro sorkarini sokatgipa chu•gimik fund-rangko name jakkalenba Garo Hills-ko tang•dodapatna kamrangko ka•angchina ge•etangaha.
Ia tom•anio West Garo Hills a•jani Deputy Commissioner Swapnil Tembe, District Profile-ko rongtale mesokanga, baksana a•jani achievement ba man•anirangko parakangaha.
Indake ia review meetingo GHADC-ni CEM Albiniush R Marak, Executive Membor-rang, Superentindent of Pulis (SP) VS Rathore, WGH a•jani Additional Deputy Commissioner, a•jani pilak sorkari Department-rangni skotong officer-rang bakko ra•angaha.
Governor BD Mishra Tura North Eastern Hill University (NEHU)-o tom•anioba bakko ra•eaha, unbaksana Tura-o rika matchotgija donchipenggipa Governor House-koba re•ange niangjolaha.