Tura, July 15, 2022: Gnigipa changna Inter Mahari Football Tornament-ko Tura Chandmari kal•chakram bipao a•bachengata. Ia kal•susaaniko West Garo Hills a•jani, District Sports Officer (DSO) aro District Administration bakrime ong•atengaha.
Indake ia kal•susaani skanggipa salo, Tegite Mahari aro Sintang Mahari kal•susaangaha.
Ia robol kal•susaaniko Tura Chandmary Artificial Turf-o ong•atenga. Ia kal•susaaniona GHADC-ni Chief Executive Member (CEM), Albiniush R Marak mongsonggipa sokgipa ong•e July jani 14 tariko oprake on•angaha.
Ia Kal•susaaniko oprake on•engon, CEM mahari-ni gamchataniko agantalate on•angaha. Unbaksana, ia Tournament-ko ong•atenggipa Organizing Committee-ni membor-rangna tangkarangko on•gilatgen ine aganangaha.
GHADC-ni Executive Member saksa, Stevie M. Marak tournament-ko ong•atenggipa manderangko de•mittele aganangan baksana tangka gong hajar 50-ko Organizing Committee-na dakchakatgen ine ku•rachakangaha.
Una agreba West Garo Hills a•jani Additional Deputy Commissioner aro Organizing Committee-ni Chairman, Dolrich Berlin Ch Momin rimchaksoani kattarangko aganprakengon, Inter Mahari Football Tornament-ko skanggipa chango ge 16 mahari-rang kal•susaangaha, indiba gnigipa chango ge 32 mahari kal•susaanio bakko ra•enga.
Ia tournament-ni bon•kamgipa kal•susaaniko August-ni 13 tariko kal•anggen ine aganangaha.
Ia Tournament-ni skanggipa kal•susaanio Tegite Mahari, Sintang Mahari-ko goal 3-chi amataha.