Mawshynrut, July 15, 2022:West Khasi Hills a•jani Mawshynrut elakkani ning•o donggipa Aradonga PWD Inspection Bangalow (IB)-ko FKJGP Mawshynrut Circle-ni FKJGP Aradonga Unit, Sukrobar salo re•ange nieaha.
FKJGP Aradonga Unit-ni Organizing Secretary Mathias Marak-ni u•iatani gitade, “Chingni re•bae nikanio ia (PWD) IB-ko galchipe donako nikeaha aro ia nokni obostarang namen namjaha, maina ia nokko nirokgipa dongjani a•sel indakgipa obosta ong•aha. Ia a•jao dongenggipa manderang dingtang dingtang officer-rang aro gipin biaponi ba a•paloni re•bagipa manderang dongchak tuchakani biapko man•jaenga, maina Aradonga-o donggipa PWD IB-ko galchipani a•selo indakgipa obostarang ong•enga”.
Uni gimin FKJGP Aradonga Unit, galchipe donenggipa Aradonga PWD IB-ko ta•rake taripile on•china a•dokni PWD Minister-ko mol•molataha.