Tura, Nov 30, 2022: GHADC-ni 6-gipa Session-o ruling aro warachakenggipa dol namgipa chanchianirangko aro sing•anirangko dakaha, ia chanchianirango pangchake, namgipa kam ka•ani culture-ko ra•bana man•gen ine Deputy CEM Nikman Ch.Marak ka•donganiko parakataha.
Nikman Marak-ni parakatani gitade, 6-gipa session-o mongsongbate tourism-ni gimin chanchiangaha. Tourism Department GHADC-ni gita ge•sa gital bikotgipa ong•a, tourism department-ara ge•sa developmental approach-ko man•na gita aro India-ni ba a•gilsakni map-o Garo Hills-ko napatna miksongani ong•a. Uni gimin an•chingo tourist department-ni dingtang dingtang kam ka•na nanggnirang aro ka•mangiminrang donga. Iarangko tang•doatna gita tourist department-ko bikotaha aro iani bidingo namen chanchirimaniko dakaha.
“Chingni chanchirimani gita beben, District Council-ni tangka paisarang chu•ongjani gimin dal•gipa project-rangko ra•bana man•ja, indiba chinga, an•chingni tourist spot ba tourist biaprangko namdapatchina aro tangka paisarangko on•china” India sorkario proposed ka•enga.
Jedake South Garo Hills-o mingsinggipa Wari Chora, Balpakram National Park, Tolegre Cave, Dombe Wari uandake dingtang dingtang tourist spot-rang donga, West Garo Hills-o Nokrek National Park donga aro bang•a dingtang dingtang mingsing minggamgipa channa, mingna man•gijagipa tourist biaprang donga, uarangko ma•mong sorkariona sokate ba approach ka•e, developmental project-rangko bang•kale on•ne, Garo Hills-ni tourist biaprangko a•gilsakni tourist destination map-o napangnaba donga, unode chadamberangna aro uano songdong a•chaggipa sakantina bang•a janggi tangani cholrangko on•na man•gen ine chinga chanchiaha. Uni gimin da•alo ian mongsonggipa chanchirimani ong•a ineba aganaha.
Gnigipao, saksa mande ra•ako man•na kragipa membor-ni ra•bagipa Seperate Electoral Roll (SER) dongachim. Indiba “Chinga ia SER-ko tarina skang Garo Customary Law (GCL)-ko tarigipa matchotkujani gimin SER-ko dondipatkuenga, iako tarijawa ine jechakani ong•ja, iakoba tarigen, indiba somoirangko nanggen. SER aro GCL-ko apsan somoio taria ong•ode, chingna namen neng•beani ong•a. Ia GCL-ko re•baenggipa December 6 tariko apsan asongenba bon•chote nipiltaianiko dakna tik ka•angenga. Ia GCL, jean Nokma A•king mamlao, A•ani mamlao aro dingtang dingtang an•ching A•chik jatni gamrangna badi ka•anio Court ba Katchari-o serik-tokrika dongjani gimin, manderang bang•a neng•nikaniko man•beenga. Rai on•na gita Judge-ba, Revenew EM-ba aro CEM-ba man•jaenga, uni gimin chinga da•alo Garo Customary Law-ko tarichengna jotton ka•enga. Maini gimin GCL-ko nanga, maina an•ching aganrittingasan ong•aia, Nokma sako gatgen, sawa Nokmara Custorian ine bisongko agana, indiba aganrittingasan ong•aia serik-toke dona dongja. Nokmara sako gata? Nokrom dongipako ba Nokna dongipako Nokmade pangnan gatronga. Indiba iade aganrittingasan ong•aia, see toke dona dongja. A•gate cha•gipako Nokma gatna man•ama man•ja, uni giminba aganrittinganiko aganeng, indiba uamangde man•ja, uamangba basakobade, chingaba demechikan, depantean ine bisongni a•kangbaaniko an•ching nika. Uni gimin ia Customary Law-ara da•alo aro salantio nanggipa ong•ani gimin, chinga skanggipa GCL-ko tarienga. Haida mikkang bilsiode, chinga Session ong•on, GCL-ko pass ka•na man•gnok! maina December 6 tarikon chinga bon•chote nipiltaianiko dakenga. Indake GCL-ko matchotani ja•mano jekon an•ching A•chik sakantian nangnikengachim, SER-na re•chakatgen, una election department-ko kulina nangnaba donga, niamrangko tarichengna nangnaba donga. Ia niamrangkoba chinga ka•sinne tarina a•bachenggen aro uko jechaka ong•ja, namemanchaan chingni gisik ka•tongo miksongani donga. Indiba ia ge•gni dal•dalgipa niamrangko apsan somoio tarina man•ja baksana legal department-ko ba legal expert-rangko chingna mande nanggen, uarangni gimin chinga dondipatchengenga. Chinga mikkangchi iarangko pass ka•gen aro dingtang dingtang chanchianirang da•alni session-o ong•aha. Ia session-o chanchianirang sakanti MDC-rangni chanchie ra•bagiparang ong•a aro mikkangchi sakantini chanchianirangko dondime GHADC-ko nama gadangona sokatna jotton ka•enga” ine Nikman Marak agan-talataha.