Tura, Sept 25, 2022: Meghalaya Judo Association (MJA) aro Director of Sports and Youth Affairs, Shillong baksa bakrime, September 23 aro 24 tariko SAI, STC Indoor Stadium, Nehru Shillong-o ong•atanggipa Judo State Championship-o Garo Hills-ni sak 11 chadamberang practice ka•e bakko ra•eaha aro North East Olymic Games-o kal•susana Seokako man•aha ine koborna u•iataha.
Garo Hills-ni sak 11 Judo State Championship-o bakko ra•giparanga Jarmin M.Sangma (Coach), Saroj Rishi, Jakrik M.Sangma, Tengkam T.Sangma, Epilson Ch.Sangma, Bicker A.Sangma, Niksengbirth A.Sangma, Rakchon R.Marak, Anggat Lohar, Kailash Rai aro Tesatchi Sangma.
Iarangongoni sakbri (4) Medalrangko man•aha. Uamanga Jakrik M.Sangma kg 64 category-o kal•susae Silver Medal-ko man•aha, Bicker A.Sangma kg 64 category-o kal•susae Bronze Medal-ko man•skaha, Epilson Ch.Sangma kg 79 category-o kal•susae Siver Medal-ko man•aha aro Niksengbirth A.Sangma kg 74 category-o kal•susae Bronze Medal-ko man•aha.
Indake jemangan kal•susaanio gnigipa ong•e, Silver Medal-ko man•ahachim, uamangko North East Olympic Games-o kal•susana seokako man•aha ineba u•iataha.
North East Olympic Games-o kal•susana seokako man•giparanga Jakrik M.Sangma aro Epilson Ch.Sangma.
“Da•o chinga mikkangchi una bate nambate dakangna gita dakchakanirangko on•ode, A•chik chadamberang namgipa Medal-rangko man•bae jat aro a•songna mikkim rasongko ra•bana ka•dongenga” ine Jarmin M.Sangma u•iataha.