Ampati, Sept 25, 2022: Reanggipa September 22 tariko FKJGP Ampati Zone, South West Garo Hills, Betasing Community Hall-o tom•aniko ong•ate, FKJGP Ampati Zone, gital Executive Committee, FKJGP Betasing Circle-ko songe dilgiparangko seoke on•angaha ine koborna u•iataha.
FKJGP Betasing Circle-ni gital dilgiparanga Kremixdson D.Shira President, Marush Sangma Vice-President, Brejio M.Marak General Secretary, Mesanday Arengh Joint Secretary, Nikjagring Sangma Chief Organizing Secretary, Sengrak Ch.Marak Publicity Secretary, Birthing Momin Education Secretary, Jester Sangma Environment Secretary, Salseng Marak member, Laban Marak member, Tengku Sangma member, Sendrik Sangma member, Debora Sangma member aro Trainiel Sangma member.
Ia seoka man•gipa FKJGP Betasing Circle-ni gital Executive Committee Member list aro application-ko FKJGP Garo Hills Zone, Tura-ona watatataha. Indake FKJGP GHZ, Tura September 24 tariko jadok (6)-na adhoc basis-o approved ka•e on•ataha ine FKJGP GHZ, Tura-ni General Secretary Matsram A.Sangma u•iataha.
Uni ja•mano FKJGP-ni dongimin niam gita uamangni kam ka•anio pangchake, FKJGP CEC adhoc basis-oniko chu•gimik FKJGP-ona approve ka•atgen ineba u•iataha.
Indake gital seoka man•gipa FKJGP Betasing Circle adhoc body-na FKJGP GHZ, Tura, uamangni mikkangchi kam ka•anirango chu•sokgipa ong•china nama sikaniko on•ataha.