Tura, October 27, 2022: Meghalaya a•doko bang•a poraia matchote roenggipa chadamberangni kam man•gija roaniko jegalna FKJGP jingjengataniko ong•atanggen ine koborna parakataha.
FKJGP Garo Hills Zone-ni President Pritam Arengh, “Chinga FKJGP dol indita ru•uta bilsirangna kingking bang•a poraia matchote roenggipa chadamberangni kam man•gija roaniko nike uamangna chakpaaniko mesokna gita October jani 28 tarik Sukrobar pring 11 bajioni Mothphran-oni Laitumkrah Fire Brigade Ground-ona jinma re•jome jegalaniko dakanggen. Indake uamang Ground-ona sokani ja•mano attamni 2 bajio jinma apsan tom•e chanchirimgen. Uni gimin Shillong-o donggipa pilak A•chik chadamberang ia re•jomaniona aro tom•aniona re•bae bakko ra•epachina mol•molatna sika” ine u•iataha.
Sorkari kam gri roenggipa chadamberangna kamrangko on•na maming ja•kuko de•jaha. Uni gimin chinga FKJGP sorkarini kamko jegale re•joman baksa tom•aniko ong•atenga ine u•iataha.
FKJGP-CEC-ni pilak dilgiparang, chadamberangna chakpaaniko mesokna gita, ia ja•kuko de•enga. Unbaksana FKJGP Garo Hills Zone-ni dilgiparang Garo Hills-ni bang•a bakrangon iani bidingo tom•aniko ong•atanggen ineba u•iataha