Tura, March 3, 2022: A·chik jatni mangrakbegipa ku·monganichi February jani 28 tarik ko “Garo Awakening Day” ine bimung donako man·aha. Ia gamchatbegipa bimungko ma·naniara A·chik a·songo songdongenggipa pilak maa-pa,jong-ada,no-abi rangni melie nangrime janggi tangna kengija jat-tangna an·tangko on·kange rake kam ka·ani bite ong·a aro ia an·chingni gisik ra·kamna kragipa sal ba ong·a ine Garoland State Movement Committe (GSMC) Pedaldoba Regional Unit dolni President Pa Rimjen Ch Sangma aganaha.
“A·chik a·songni a·kitik brioni ia jingjengataniona re·bae bak ko ra·anggipa sakantikon anga mitelna ska,mikkangchiba indake ku·mong nangrime kamko ka·angna gita mangenchimode A·chik a·song aro A·chik jat silroro namrorogen aro an·chingni ru·uta bilsirangna dabienggipa Garo Customary Law (GCL),Service Rule,Finance,Separate Electoral Roll aro dingtang dingtang kamrangkoba chu·sokatna gita man·gen. Mikkangchiba an·ching apsan kamko ka·angna jedakode an·ching Amani chigako,ambini nokapko,A·chik jatni niam retiko tangkame rakkina gita man·gen” ine Pa Rimjen Sangma Kosi Songbad na u·iataha.