Williamnagar, April 26, 2023: Williamnagar-ni nangrimgimin NGO-rang Monggolbar salo tom•aniko ong•ate, Roster System aro Winter Capital-ni bidingo chanchirimani ja•man jinma re•jomaniko dakangaha.
East Garo Hills a•jani dol 8 NGO-rang GSU, FAF, AAYF, AIGU, WGCSU, WLCSU, WATA, Sumo, Pick-Up Association, songni nokni manderang aro chatro chatrirang jinma apsan ku•monge, Roster System-ko ra•gatchina mol•mole, a•dokni Skotong Minister Conrad Sangma-na lekka sedoataha.
“Roster System-ara darangkoba mikkang nigija kamrangko on•china High Court raiko on•aha. Bang•a Department-rang jekai Secretariat aro Directorate Office-rango kam ka•gipa, A•chikrang namen komia. MeECL Department-ni Head Office-o kam ka•enggipa A•chikrangoni saksaba dongja. An•chingni gitcham dilgiparang, Job Reservation Policy-ko ra•gate, A•chikrangna 40%, Khasi aro Jaintia-na 40% ko tarie donangaha. Uni gisepon, High Court-ni Roster System-ko ra•gatchina raiko on•aniara, jatna namgniko ra•baani ong•a. Roster System, ian Job Reservation Policy-ni bak ong•a, uni gimin pilakan iako ra•chakna nanga. High Court darangkoba mikkang nigija, Job Reservation Policy-o pangchake kamko on•china raiko on•aha” ine EGH a•jani NGO-rang janapataha.
Meghalaya a•dokni bang•a bakrangon, chu•onga gita skie ra•ani institution dongkuja. Garo Hills-o poraienggipa chatro chatrirang, Entrance porikkarangko sena Shillong songjinmaona re•angna nangenga. Uni gisepon, badiaba chadamberang tangka paisana neng•nikaniko man•ne porikkarangko serikna man•ronga. Shillong songjinmao chu•onga gita bidako skie ra•ani institution-rang gnang, chadamberang general quota-o gipinrang baksa susapana chu•onga gita skianiko man•genchimoba, a•dokni gipin a•jarango chagrongenggipa neng•nikanirangko nigrikna nanga. A•dokni bang•a biaprang aro a•jarango, Shillong songjinma gita namnamgipa college-rang, institution-rang dongja. Uni gimin Garo Hills-ni chadamberang bidana brange, gipin a•dokrangchi re•ange poraianiko niatode, poraia matchoteba kamrangko man•rongja, uni gimin Roster System-ko jatni namgnina ra•gatna nanga ine NGO-rang janapataha.
Meghalaya a•dokko man•chengaoni Tura-ko Winter Capital songna chanchie gitcham dilgiparangni tik ka•anggimin gnang. Uni gisepon, Tura-o Winter Capital-ko songgenchimode, a•jao bang•a tang•dodapani ong•genchim. Uni gimin manderangni nangnika gita namgniko ra•bana,Tura songjinmao Winter Capital-ko songna nanga ine NGO-rang dabiangaha.