Tura, April 21, 2022: Batanggimin salo Easter Monday-o piknik cha•e tanggitik a•sel ong•anichi bang•a manderang janggitangko gimaataha.
Ia obostani bidingo WGH a•jani District Administration, Mothers Union aro dingtang dingtang NGO-rang baksa bakrime Deputy Commissioner office nokdringo tom•aniko ong•atangaha. Ia tom•anio Giljani dilgiparang, Social Organization-ni dilgiparang, Nokmarang, skulo skigiparang aro bang•a gittimni dilgiparang bakko ra•angtokaha.
Indake WGH a•jani Deputy Commissioner Ram Singh, ia tom•aniko ong•atani miksonganiara bang•a piknik cha•ram biaprang aro tourist biaprango ringe cha•e kusi ong•aniko champengna ja•ku de•na chanchirimaniko dakangaha.
Re•anggipa changoba apsan obostani bidingon chanchirimaniko dakaha. Da•roroni dal•drobaenggipa chadamberangko indakgipa bewaloni naljoke rakkina swimming pool aro football kal•chakramrangko tarie on•na nanga, jedakode chadamberang an•tangtangni somoirangko indin re•ataigija an•tangna namako skie ra•na gita man•gen. Uni gimin ma•a paarang pilakan dal•drobaenggipa chadamberangko nama ramao re•atna agan ku•pattianirangko on•an baksa nama kamko dakdile mesokna nanga ineba aganangaha.
Mothers Union-ni President ia tom•anio, “Dal•drobaenggipa chadamberang maini a•sel namgija ramako ja•rike nosto ong•ako man•enga? Easter Monday-o ong•anggipa obostako nike pilak chadamberangan mikkrakna nanga. Chadamberangko nama ramaona dilbana ma•a paarang noktangtango nirok simsakna nanga. Garo Hills-o chadamberangna je kal•chakani ba rochakani biaprang dongachim, uarang chu•ongkujaenga” ine aganangaha.
Ia tom•anio bang•a ku•pattianirang jekai Committee bikotani, chu dokkanrangko nirok sandiani, pilak chadamberangko nirok simsakani, chadamberangko nama ramaona dilbana nanga ineba bang•a dilgiparang aganangaha.