Resubelpara, April 21, 2022: Meghalaya a•dokni sorkari Common University Entrance Test (CUET) porikkana Shillong aro Tura-o mangmangsan centre-ko donaigija gimik Block-rangon centre ge•prakko donna nangchongmota ine Rongrong elekka-ni MDC Rinaldo K Sangma parakataha.
“National Testing Agency (NTA) poraienggipa pilak chadamberangkon BA,BSC,BCOM-na admission-ko ra•na gita CUET porikkako setelna nanga ine u•iataha.Meghalaya a•dokni bang•a kolege-rang NEHU-o affiliate ka•gipa ong•ani gimin a•dokni pilak chadamberangan CUET porikkako sena nanga. Uamang class 12-ni porikkako pass ka•genchimoba kolege-rango admission ra•na skang CUET-ni porikkako see pass ka•na gita nanggen. Meghalaya a•dok sorkari ia porikkako sena skang chu•onga gita Exam Centre-rangko donna nangchongmota, jedakode chadamberang maming neng•nikani gri porikkako sena man•gen.Garo Hills-ni kona noksikrango donggipa pilak songni manderang Shillong-ona ba Tura-ona re•ange porikkako sena chol ong•pajawa. Uni gimin, anga dilgiparangko mol•molna sika, CUET porikkana a•dokni pilak Block-rangon Centre ge•sako donna nanga” ine Rinaldo K Sangma didiataha.