Williamnagar, July 18, 2022: East Garo Hills a•jani NGO-rang, GSU, FKJGP, FAF aro AIGU apsan nangrime MeECL Department-ni kamko jegale Poster Campaign-ko ong•atangaha. A•jao bijoli tik ong•simjani bidingo uamang MeECL Department-na lekka sedoangaha aro sal 15-ni gisepo uamangni sing•anina aganchakaniko on•na nanggen ine janapataha.
Indiba sal 15 batangoba uamang mamingkon aganchakjani a•sel, Sombar salo poster campaign-ko ong•atangaha.
Indake uamang jinma poster-rango see, “Bijoliko pilakan nangchongmota, uko kal•ake rona nangja, Bijoliko tik ong•e watna nanga uko dakam dakdoe rona nangja, MeECL Department-o chu•onga gita kamrangko ka•na manderangko rakkina nanga, kamna manderangko rakkiengon mikkang nitegija bida gnanggipa aro kam man•na kragipa mandekosa rakkina nanga, 2020 aro 2021 bilsio Khasi Hills a•jao bang•a kamrangko nakatate manderangko seokangaha, indiba Garo Hills-o kam mingsaba nakatata dongja” ine seenba jingjengataniko dakangaha.
Indake uamangni sing•anirangna MeECL Department nama aganchakaniko on•jagenchimode, uamang July 21 aro 22 tariko office picketing-ko ong•atanggen ine GSU Eastern Zone-ni President Saljrang Tengrik Marak parakataha.