Shillong, October 6, 2022: Ri-Bhoi a•jani pulisrang pekgipa samrangko badinggipa manderangko Byrhihat-o rim•aha ine kobor man•aha. Pulisrang ua manderangni garioniko gong kror 1-ni heroin-ko man•aha ineba u•iataha.
Ia pekgipa samrangko badingenggipa me•chik sakgni aro me•asa saksako pulisrang rim•aha. Rim•a man•gipa sakgittam manderang Nagaland aro Manipur a•dokoni ong•achim. Uamangoniko ge•gittam mobile phone-rangko pulisrang ra•sekaha.
A•dokni Skotong Minister Conrad Sangma, ia obostani bidingo kobor man•soe Twitter-o, “Pulisrangni rakbee kamrangko ka•e a•dokona ra•baenggipa drugs badinggipa manderangko rim•a man•ahani gimin, anga uamangko dingtangmancha mittelpilna sika” ine tweet ka•ataha.