Ampati, September 21, 2022: South West Garo Hills a•jani ning•o ga•akgipa Mahendraganj Pulis Station-o batanggipa 2018 bilsini August 16 tariko, sakgittam manderang Anju Ray, Robi Ray aro Milon Ray ong•achim, uamang me•chik saksako doke saknaataha ine thana-ona re•bae badi ka•aniko man•ani bakan Mahendraganj PS Case No. 23(08)2018/ U/S 326/447/34 IPC-o pangchake mamlako segataha.
Ia obostani bidingo UBSI Chiang Ch. Momin sing•sandianiko dakchengaha, indake bon•kamao UBSI Sanjay B.Sangma sing•sandianiko matchote dakskaha. Sing•sandianiko matchotatani ja•mano ua 2020 bilsini January 31 tariko Chargesheet-ko Court-na on•aha.
Indake trial matchotani ja•mano South West Garo Hills Court-ni Judicial Magistrate, uamang sakgittam Anju Ray, Robi Ray aro Milon Ray-ko dos donga ine sakkiko man•aha aro indake IPC 325/447-o pangchake sastiko on•china raiko on•aha.
SWGH a•jani Judicial Court, “Bilsi gnina Rigorous Imprisonment (RI), baksana dos dakgipa sakprakan tangka gong hajar 5-ko dai gamchina ge•etaniko on•aha. Indiba uamang dongimin somoi gita daiko gamna man•jaode, U/S 325 IPC-o pangchake Rigourous Imprisonment (RI)-ko jasa baridapatgen, unbaksana tangka gamna man•jaode, U/S 447 IPC-o pangchake Rigourous Imprisonment (RI)-ko ja gittam baridapatna” raiko on•aha.
Indake iani bidingo SWGH a•jani Superintendent of Pulis, A Rynjah koborna parakataha.