Dos dakgipa CRPF-ni case-ko ra•galchina didigipa Women Pulis Officer-ni kosako sandianiko dakchina NAS dabia

Williamnagar, May 7, 2022: Re•angipa April 2 tariko Rongreng Chidekgre-o dokkan dakenggipa ma•gipa saksako CRPF sipai saksa pringni cha ringna re•bae kal•akdrana jotton ka•ani bidingo Williamnagar Pulis Station-o badi ka•e mamlako segataha.Indake ua mamlako segatani jasa ja•man, dosi dakgipa CRPF sipaina chake Williamnagar Women Pulis OC, duko ga•akgipa ma•gipaona re•ange, ua mamlako ra•galpilchina didiaha ine duko ga•akenggipa ma•gipa parakataha.

Williamnagar-ni Women pulis Officer, ma•gipa saksako ong•gija dakna dragipa CRPF sipaiko jokatna miksonge, ma•gipa saksani neng•nikaniko ba duk ong•aniko nikengon, maini gimin dosi dakgipa CRPF sipaina chake neng•nikako on•dapaniara krani ong•ja ine Niksamso A•chik Society (NAS), Garo Community Organisation raken jegalataha.

Duko ga•akenggipa ma•gipana kakket bichalko on•ani pal, batesa dosi dakgipa CRPF-ko jokatna ja•ku de•e kam ka•aniara CRPF sipai baksa Williamnagar Women Pulis Officer-ni jangilo maiba dal•a miksongani dongna nangchongmota, ong•jaode ua women pulis officer, maina duko ga•akenggipa ma•gipani nokona re•angpile CRPF sipaini mamlako ra•galchina didina nanga. Women Pulis Officer-ni indakgipa kamara A•chik jatko pale cha•ani aro onchepani kamsa ong•a ine NAS-ni President Tengrak Marak parakataha.

“Chinga Women Pulis Officer-ni kamko ra•chakna man•ja aro uni kosako raka ja•ku de•aniko dakanggen” uni gimin jedakeba duko ga•akgipa ma•gipana kakket bichalko on•na nanga aro niamko pe•gipa Women Pulis Officer-ni kosako sing•sandianiko dake niam gita sastiko on•na nanga ine NAS, East Garo Hills a•jani SP-ko didiangaha.