Doldenggagre songo ong•anggipa obostako ADE jegala 

0

Tura, March 16, 2023: Association for Democracy and Empowerment (ADE) Apex Committee, HQ Tura-ni General Secretary Supam R Marak, “Chinga gnigipa changna MDA-II sorkariko rikenggipa dilgiparangna nama sikaniko on•na kusi ong•a” ine parakataha.

Chinga NGO-rang a•dokni namgnina kamko ka•na an•tangko kang•kare ka•aha. Chinga GHADC-o kam ka•enggipa manderangni dormaharangko jaanti sokatchina, GHADC-ni eleksin-o dingtang elektoral roll-ko tarichina, GHADC-o Service Rule aro Financial Rule-ko ra•gatchina, Garo Customary Law (GCL)-ko ra•gatchina, Assam a•dokna pakwatatgipa A•chik songrangko ra•nappilchina, Inner Line Permit (ILP)-ko ra•gatna, niamgri a•dokona napbaenggipa manderangko sandina, aro poraia matchote kam gri roenggipa Chadamberangna kam tikatchina ku•rangko on•aha, ia dabianirangko knachakja dipetde ja•ku de•e ku•rangko on•angkugen ine parakataha.

“Chinga February 25 tariko, chingni President Dalseng Bira Ch Momin baksa Doldenggagre songo ong•anggipa obostako raken jegala. Chinga ia obostani bidingo name sing•sandianiko dakaha aro songni manderang chingni batanggimin salrango Rakesh Newar-ni GHADC-o CEM ong•aniko a•rikgalani bidingo ding•doe dongenga ine u•ina gita man•aha. Obosta ong•gipa biapo donggipa adita manderang chingni President Dalseng Bira Ch Momin-ko Rakesh Newar-ko CEM-nii chokkioniko a•rikgalgipa mande ine aganenba jinma chadrapaha. Chingni President saksande ia re•jomaniko ong•atja, indiba bang•a NGO-rang apsan meliesa ong•ataha. GHADC-o gipin jatni sason ka•niko nangnikjaesa chinga NGO-rang ku•cholsan kam ka•e, A•chik skakosa CEM-ni chokkio asongatpilaha. Ia obostani bidingo badi ka•aha aro ta•raken kakket bichalko man•a kadongsoenga” ine Supam R Marak u•iataha.

Dalseng Bira Ch Momin bilsi 20-mang ong•ple NGO-o donge kamrangko ka•enga. Ua an•tangni changa sapaniko jakkale A•chik jatna aro A•chik a•songna kamrangko ka•aha. An•chik jatko kal•stekgenchimode, ua pangnan chadenge obostako jegale, jatni namgnina ja•ku de•ronga. Ua kakketna kamko ka•gipa mande ong•a. Ua darang mandenaba maming namgijaniko ra•bana miksonge kamko ka•gipa mande ong•ja. Indiba mitam manderang an•tangni namgnina uni bimingko so•e cha•aha aro social media-rango ong•gijagipa koborrangko gipataha. Manderang an•tangni man•gnina gipinko indake galongen ine chinga maming dakeba chanchisoani dongjachim. Chinga Dalseng Bira Ch Momin-ni kosako ong•anggipa obostako raken jegala aro una kakket bichalko ra•bana raken kamko ka•anggen ineba ua parakataha.

Leave A Reply

Your email address will not be published.