Baghmara, Mar 17, 2023:Association for Democracy and Empowerment (ADE) Baghmara Zone, Bristibar salo, South Garo Hills a•jani Deputy Commissioner (DC)-ko gronge, dingtang dingtang nanganirangna dabie segipa lekkako on•angaha.
ADE Baghmara Zone-ni General Secretary Tigana Sangma-ni u•iatani gitade, South Garo Hills-ni ning•o donggipa A•sim Chiring LP Skul nok namsrangjani gimin, ta•rakkale taripile on•china dabie segipa lekkako DC-na on•angaha.
“Chingni re•ange nianio nikani gitade, ia A•sim Chiring LP skulko 1988 bilsini August 19 tariko kuliaha, Indiba ia LP skul nokko kulichengoni da•alona kingkingba nirok sandia dongja. Indaken skul nok namsrangjahani gimin poraienggipa bi•sarang namen neng•nikaniko man•enga. Mikka waani somoio klas-rangko ra•na gita man•jaha, skul bi•sarangni asongchakgipa biaprang namjaha. Education Department changsaba nirok simsakata dongja, ringani chi dongja, bijoli dongja, paikanarang namja, nokkingrang bangbang aro do•ga kelkirangba namjaha. Ia skulo poraienggipa bi•sarang namen dukko man•enga” ine ADE-ni dilgiparang janapataha.
Uni gimin ia skul nokko ta•rake nirok sandianiko dakenba taripile on•china ADE dabiangaha.
Ia skul nokko Education Department maming nirok simsaka dongjani a•selsa indakgipa obosta ong•aha ine nikna gita man•aha. Uni gimin education department, South Garo Hills-o badita ge LP Skulrang gnangchim, bilsianti nirok sansianiko dakna nanga aro poraienggipa bi•sarangna namgipa skie ra•ani nokrangko tarie on•na nangchongmota ine ADE Baghmara Zone department-ni Official-rangko didiataha.
Uni gisepon, ia skul nokko maming nirok sandia gri donangkua ong•ode, ADE mikkangchi rakbata ja•kurangko de•anggen ineba parakataha.