Tura, April 11, 2022: Anganwadi-o kam ka•enggipa ASHA, SSA Skulo skigiparang,Covid Contractual Staff, sorkari skulo skigiparang, Goverment Kolege-o skigiparang, Nurse-rang, Master Roll-rang, Primary aro Adhoc Skulni Skigiparang aro bang•a sorkarini ning•o kam ka•giparang uamangni man•na nanggni tangkarangko chu•onge man•jani gimin neng•nikanirangko man•enga aro uamangko darang dilgiparangan gamchate ra•jaha ine Tura-ni BJP MDC Bernard Marak parakataha.
Bernard Marak-ni parakata gitade, duko ga•akenggipa manderang jaksitangchi vote-ko sikdepe dilgiparangko seokatahaoba da•alo uamang kamtangni biteko man•na sikpae dabigenchimoba, dilgiparang uamangni dabianiko knachakgija dongenga. Mitam chadamberang ma•a pani duk ong•e mikchi ga•akako chona rema kamrangko ka•e dakchakaniko on•paenga, indiba mitam chadamberang poraina sikpaoba ma•a paa dormaharangko man•jae poraianirangko dontongna nangaona sokaha. Sorkarini kamko ka•gipa bang•a manderang uamangni man•na nanggni dormaharangko man•tokjae duk mikchi ong•e dongenga ineba Marak janapataha.
“MDA sorkariko rikenggipa an•chingni dilgiparang a•dokni skulrangko aro kolege-rangko taridapna dal•a budget-rangko on•ataha ine jinmana parakataniko dakronga, indiba bilsi 4-na kingkingba uamang skul aro kolege-rangna maming namdapataniko ra•baja. Tura Goverment Kolege, jean Garo Hills-o gitchambatsranggipa Kolege ong•achim, sorkari ia kolege-ko nirok sandie uko tang•dodapatna aro vacant post-rango manderangko gapatna kamko ka•na nanga. TG Kolege-o poraienggipa chadamberang class room-rang aro asong chakna biaprang chu•ongjani a•selo bang•a neng•nikanirangko chagronga. Tura Civil Hospital, jean Garo Hills-ni bang•a sagipa manderangna ka•dongani ong•achim ia Hospital-o chu•onga gita Samrang dongja aro bang•bata samrangkon a•palni Private Pharmacy-rangonikosa bree jakkalna nanga. Indakgipa kamrangko namdapatna sorkari ja•ku de•na nangchongmota.
Unbaksana SSA Skul nokrangko namdapatna sorkari tangkarangko sanction ka•an baksa uamangni man•na nanggni dormaharangko chu•gimik aro jaantin on•na nangchongmota. Bang•a Contractor-rangni Bill-rang da•onaba matchotgija dongenga. Batanggimin bilsi 4-o sorkari an•chingna maming on•dapani aro namdapaniko ra•bajaha, indinari somoikosan re•gramataiaha. Covid-ni somoio sorkarini kamko ka•enggipa manderangchiko ra•chakchenggipa tangkarangko da•alona kingkingba chotpilkujaenga. An•chingni dilgiparang uamangni ku•mitchetatangko pe•aha” ine Bernard Marak janapataha.