Tura, August 31, 2022: Garo Hills Autonomous District Council (GHADC)-ni Deputy CEM Nikman Ch. Marak, Monggolbar salo a•dokni Power Minister Preston Tynsong-ko gronge lekka sedoangenba Chokpot jolni wilwilao donggipa dam 20 songrango bijoli sokatkujani gimin janape, iani bidingo Inquiry Commission-chi sing•sandianiko a•bachengatchina mol•molangaha.
Uni janapatani gitade, South Garo Hills a•jani Chokpot Civil Sub-Division-ni ning•o ga•akgipa dam 20 songranga, Daji A•dugre, Daji Boldakgre, Daji Rongkuakgre, Rongbinggre, Waro Songgitchamgre, Minchi Chiringgre, Ka•ma Minchi Chiringgre, Waro Songgital, Waro Songgitcham, Bugakolgre, Sangma Matchok, Nokwatgre, Ganggugre, Kalbanggre, Rongmigre, Nekalpagre, Rongrugre, Chiringmagre aro Rongasigre ong•achim, ia songrangona bijoli sokate on•kujaenga ine janapataha.
“Batanggimin 2010 bilsion ia songrangona bijoliko sokate on•na kamrangko a•bachengaha, indiba maini a•sel, indita bilsirangna kingking ia kamko matchotatgija galchipe donaha. Iani bidingo sing•sandianiko dakna nangchongmota. Unbaksana bijoli gri dongenggipa songni manderangna ta•raken bijoliko sokatna nangchongmota” ineba Nikman Marak janapataha.
Ia kamko galchipe donanio jak donggipa officer-rang aro contractor-rangni kosako namedake sandianiko dakenba, niam gita dos donggiparangni kosako raka ja•ku de•aniko dakchina gitaba GHADC-ni Deputy CEM, a•dokni power minister-ko mol•molangaha.