Tura, June 15, 2022: Dalu-ni gitcham MLA aro changgittamna kingking Amongpara-ni Congress MDC ong•gipa, Kenethson R.Sangma June 11 tariko West Garo Hills District, UDP dolo bakrimeaha ine kobor man•aha.
Kenethson R Sangma re•anggipa 2018 bilsini Assembly eleksino MLA cherikna gita man•jaha, indake ua ia chango UDP dolo napeani miksongara, Congress party-ni dilgiparang aro MLA-rang gipin political dolo napgopangahani gimin, Congress party-o donge maming orto dongjaha ine nikenba ua a•doko nambatgipa UPD Regional Party-ko baseaha ine aganaha.
Ua a•dokni manderangna MDC aro MLA ong•e dangdike on•aha, mikkangchi manderangna dangdike on•nangkuna gitade, UDP dolo donge dangdike on•anian nambatgipa ong•gen ineba ua agandapataha.
Uni UDP dolona re•baaniko West Garo Hills District-ni UDP dilgiparang kusi ong•bee rimchaksoaha aro mikkangchi Garo Hills-o UDP-ko bilakatna ku•mongangaha.