Shillong, October 28, 2022: Constitutional Rights Forum (CRF)-ni President Greneth M. Sangma, South Garo Hills a•jani ning•o donggipa Mindikgre Chramgre songni Daniel Ch Marak-ko kal•steke aro gisikni sinjetanirangko on•gipa manderangni kamko jegalenba Assam Goalpara a•jani Superentindent of Pulis (SP)-na lekka sedoataha.
Greneth Sangma-ni u•iatani gitade, “October 12 tariko Daniel Ch Marak songtang Chramgre-ona ripengtang, Nesel Sangma-ni siaona re•baaha. Indake ua siaona re•baani joljol ma•gipani noko adita salrangna dongangaha. Ua ma•gipani noko roangmiting somoio, Robibar salo songni giljaona re•angaha. Gilja jokani ja•mano pilak manderang unbaksa golpoe rotokaha. Indake uko gronge, golpoa matchotani jamano songni saksa Sapjina M Sangma noktangchina re•angpilenba segipa Algrin Ch. Marak-na Daniel-ni kosako tol•e on•aha. Uamang jiksesa Hemendas Hajong-ni jikgipa Tamchi Momin-na call ka•ate uni (Tamchi Momin)-ni jonggipa Shenda Momin-ni janggina dal•a ken•beani ong•enga ine Daniel Marak, Shenda-ni kosako kal•ake rona am•enga ine tol•e aganataha. Indake Shenda Momin indakgipa koborrangko knasoani ja•mano Dudhpara Pulis Station-o badi ka•aha. Ua (Daniel Marak), Hemendas Hajong aro uni nokdangni manderang baksa Dudhpara Pulis Station-ni pulisrang ka•mikkenate aro dagrange roaha. Indake ua gimikni gitan dagrangako aro sinjetanirangko man•ne, Baghmara Pulis Station-ona re•angenba uni chu•gimik obostako Pulisrangna aganeaha aro an•tangni janggina naljokaniko bi•aha” ine janapataha.
Batanggimin 2013 bilsio Daniel Ch Marak aro giljani ka•rimskarang, Gilja noko Robibar changantian gilja ka•ronga. Indake 2018 bilsio Hemendas Hajong aro uni nokdangni manderang gilja sepango donggipa a•arangko ra•sekdrana jotton ka•aha. Adita jarangni ja•mano Hemendas Hajong, gilja nokni ka•rimskarango mamingkob sing•sandia gri giljani wa•arango den•ne an•tangni nanganina jakkalaha. Ia obostani bidingo Hemendas aro uni jikgipa Tamchi M Momin-ko agan skie ra•ahaon, uamang batesa bobil dingaha aro giljani chu•gimik wa•arangko dengale galaha. Indake 2021 bilsini November 20 tariko Tamchi Momin aro uni segipa Hemendas Hajong, gilja nokona napangenba, olakimiting somoio video record ka•e, uko ong•gija kattarangko see social media-o upload ka•aha. Indake apsan bilsini November 27 tariko, uamang jiksesa aro gipin manderang gilja nokona napantaie gilja ka•enggipa manderangko dagrange roan baksa rong•te gotataha. Rasong gnangbee darangba ua obostao a•sel ong•aniko man•jaha. Gilja noko obosta ong•aniko chagronge Daniel Marak noktangona re•baplengon, Hemendas Hajong Chu ring•e ramao rosoe uni shirt-ni collar-ko rim•skepaha aro jitpake ga•akataha. Uasan ong•aigija 2021 bilsini June 8 tariko, Tamchi Momin-ni pagipa aro Hemendas Hajong-ni Mamatang, Rospel Momin, (Daniel Marak)-ni bolko maming sing•cheng sanchenggija rate galaha. Rospel Momin-ni kamko nike Daniel Marak uko beng•e ra•na jotton ka•genchimoba, Rospel Momin aro Bijet Momin jiksesa uko batesa dagrangaha aro uamangni sa•raona salantian jabolrangko galronga ine tol•e potdrae bolko rattonge galangaha. Uamang jiksesa, Daniel Marak-ni noksulona re•gipa ramakoba kachangaha aro uni kosako tol•e kattarangko aganne songgimikna gipataha. 2021 bilsini November 14 tariko Resshe Mizraim M Sangma aro uni ripeng Derick R Marak, gilja nokona re•angaha aro Daniel Marak-ba gilja nokona re•ange changantian bakko ra•paengachim. Indake uamangni olakimiting somoio, Bijet Momin gilja nokona napangenba chrike giljani manderangko aganchonnike roaha. 2022 bilsini July 22 tariko Tamchi Momin giljani manderangko aro songni dilgiparangko nokona okamate tom•aniko ong•ataha. Ia tom•anio songni dilgiparang Daniel Marak-ko sing•sandianiko dakaha, indiba uamang maming dosko man•jaha. Tom•a matchotani ja•mano Tamchi Momin aro uni segipa, Daniel Marak-ko go•olchi dokpretaha aro uko so•ote galna ku•chingaha. 2022 bilsini July 25 tariko, Tamchi Momin aro uni segipa Dudhpara Pulis Station-o Daniel Marak-ni kosako tol•e badi ka•aha. Indake pulisrang Daniel Marak-ko sing•sandina okamataha aro uko mamingkoba singchenggija, Dudhpara PS-ni Officer I/C uko ka•mikkenate dokna a•bachengaha aro gipin toromko ja•rikchina dagrange roaha ine u•iataha.
Hemendas Hajong aro Tamchi Momin Rongjuli songo songdongchengaha. Ua songo songdongmiting somoio uamang noksulrang baksa kajia golmal ong•ronga aro pulisni bilko ong•gija kamna tol•e badi ka•ronga. Uamangni kamko namnikjae songni manderang uamangko a•rikgale galaha. A•rikgalakko man•ani ja•mano, uamang Agam songo Daniel Marak aro gipinrang olakiram gilja nok sepango dongna a•bachengaha.
Uamang Daniel Marak-ko aro giljani manderangko kal•steke chonnike roaha. Unbaksana Daniel Marak-ko so•ote galna ka•mikkenataha. Ong•anggimin obostarangko niate, dos dakgipa manderangko niamo pangchake sasti on•na nanga aro dos gri Daniel Marak-na kakket bichalko ra•bae on•na nanga ine Greneth Sangma janapataha.