Tura, Feb 2, 2023: Skotong Minister Conrad Sangma re•baenggipa eleksin-o NPP candidate-rangko cheatna rakbee kamrangko ka•engon, February 2 tariko Selsella Simbukkolgre-oni NPP candidate Albinstone B.Marak baksa campaign-ko a•bachengataha.
Gnigipa tom•aniko ba campaign-ko Phulbari-ni NPP candidate AT Mondal baksa Chigitchakgre, Bandanggre aro Rondupara songo ong•atangaha.
Uni ja•mano Tikrikilla-ni NPP candidate Jimmy D.Sangma baksa Bhangarpara Cemetery, Patharkata LP Skul, Maulakandi Bajar, Debragre, Sabanggre songrango ong•atangskaha.
Indake bon•kamgipa jinmani tom•bimonganiko Bajengdoba-ni MLA Pongseng R.Marak unbaksa bang•a hajalni hahal manderang, Conrad Sangma-ko mande ra•bee, una chakpaniko mesokangaha. Ia tom•bimonganio Resubelpara-ni MLA aro NPP candidate Timothy D.Shira, North Garo Hills District President, Bolsong-ni MDC Crozier Momin aro GHADC-ni MDC Aldo A.Sangma dongpae NPP candidate Pongseng R.Marak-na campaign ka•angtokaha.
Indake apsan tom•anio Skotong Minister Conrad Sangma aro gipin NPP dilgiparang, Rongrong-ni gitcham MDC aro Skotong Minister gitcham Salseng C.Marak-ni depante Silman K.Sangma-ko bang•bea manderang kusi ong•bee NPP nokdangona rimchaksoaha.