Tura, Feb 3, 2023: Rongram-ni MLA aro MDC gitcham Ismail R.Marak, re•baenggipa Assembly eleksino susana BJP ticketna dorgasto on•ahachim, indiba BJP dilgiparangni ticket on•anina suk ong•gijaniko parakataha.
Ismail Marak-ni kobor ra•timgiparangna aganani gitade, Tura City District Committee-ko chalaienggipa Karyakarta-rang namen nama, indiba jerangan Assam-ni ba ma•mongni BJP dilgiparang re•bae, uamang booth level committee-chi re•ange, Mandal committee-rangko rime ground report-ko ra•gen ine agana. Ground report-ko ra•ani ja•mano, jemangan ground report nama uamangnasa ticket-o on•gen ine agana.
Ground report-ko chinga namen tarijok, indiba report ra•angani ja•mano, membership drive-ko dakbo ine agana, una membership drive-koba dakjok, uni ja•mano door to door re•ange campaign ka•bo, ine aganani gimin, ukoba dakaha aro uamangni jeko agana ukon dake chu•sokatjok.
Indiba je member-rang dakja uarangnasa ticketko on•atjok, jean BJP-ni candidate saksa Bakul Hajong Mahendraganj-na ticket galachim, indiba gipinna ticket on•ne, uko Rajabala-chi rimange ticket on•atskajok, ua Rajabala-ni gimin mamingkon ma•sijachim. Unbaksana, Edmund K.Sangma jean ru•uta bilsirangna Raksamgre-o tariachim, unaba ticketko on•jajok, ua Phulbari-o ticketna galjachim, indiba Phulbari-nasa ticket on•atskajok.
Indide BJP party-ara, BJP party-ko amatna ba cheatna kam ka•engama, ma BJP-ko lost ong•atna kam ka•enga ine Ismail Marak sing•doangaha.
“Beben da•alo BJP North Tura-o angna ticket on•ode, amgen ine aganna man•genchim, indiba angna ticketko on•jajok. Uni gisepon Rituraj Sinha, Rupam Goswami aro Assam-ni Deputy Speaker Numal Momin, walgimik phone ka•e angko Dadenggre-o chakatbo” ine aganaha.
“Anga Dadeng-o maidake chakatgen, na•song angna jagni somoiko on•ode man•genchim, indiba sal 25-ni gisepo anga Dadeng-chi re•ange chakatna man•jawa, ine anga aganchaka, uni ja•mano Rituraj angko ka•onange, na•a chakatna sikode chakatbo, chakatna sikjaode chakatnabe, anga nangna kror 1 tangkako on•enga ine aganaha. Angna tangka nangjawa aro anga Dadeng-chi re•ange chakatjawa, anga manderangni emotion donga North Tura-o tarijok. North Tura-on chakatgen, na•a ticket on•na sikjaode, jean ticketna capable ong•a unan on•bo ine aganchakatjok. Uni ja•mano ticketna galna skang, Earnest Mawrie jean Meghalaya State-ni BJP President ong•achim, angniko tangka lak 10 srona bi•a, anga bani tangka lak 10-ko on•na man•gen, angaba saksa candidate ong•paenga.
Uni gimin BJP-ara corruption-ko namatna re•baengama, ma candidate-chiko tangka srona re•baenga, indide biara tangka party-nasa bi•achim-ma an•tangnasa bi•achim, ukode angaba ma•sija. Uni gimin BJP-ni indakgipa manderang kam ka•ode, Garo Hills-o BJP seat ge•sakoba man•angjawa” ine Ismail Marak parakataha.
BJP party namja ong•ja, nama anga BJP-ni dilgiparang Narendra Modi, Amit Shah, Rajnath Singh-ko namen namnika maina uamang dal•begipa India a•songko chalaienga aro BJP party nama, indiba kam ka•enggipa Karyakarta-rang namja ine Ismail Marak agandapataha.