Shillong, Mar 8, 2023: Mijal Mongolbar salo, National People’s Party (NPP)-ni National President Pa Conrad K Sangma, a•songni Prime Minister Narendra Modi, Union Home Minister Amit Shah, Assam-ni Chief Minister Himanta Biswa Sarma, Sikkim-ni Chief Minister Prem Singh Tamang aro Jharkhand a•dokni Chief Minister Hemant Soren-ni mikkango, gnigipa changna Meghalaya a•dokni Skotong Minister ong•e, Shillong Raj Bhawan-o ku•mikchetangaha.
Skotong Minister Conrad K Sangma-ni dilanichi, ia chango sakgni Deputy Chief Minister-ko songaha, uamanga Prestone Tynsong aro Sniawbhalang Dhar ong•a.
Indake Monggolbar salo, Skotong Minister aro sakgni Deputy Chief Minister baksana, gipin minister-rang, Marcuise N Marak, Rakkam A Sangma, Ampareen Lyngdoh, Comingone Ymbon, A T Mondal, AL Hek, Paul Lyngdoh, Kyrmen Shylla aro Shakliar Warjri, Raj Bhawan-o ku•mikchetaniko Meghalaya a•dokni Governor Phagu Chauhan dilangaha.
Cabinet minister-rangna sualgimin portfolio-rangkode konta 24-ni ja•mansa parakatgen ine u•ataha.
Minister-rangni ku•mikcheta a•man, a•dokni Skotong Minister Conrad K Sangma, kobor ra•timgiparang baksa agangrikengon, Deputy CM sakgni donganichi maming ong•gijani dongja, indiba ian a•dokni dingtang dingtang biaprango dilgiparangni bilakaniko mesokani ong•a ine parakataha.
MDA-II.0-ko songanichi, batanggimin bilsi 5-ni gisepo ka•e matchotgijagipa kamrangna gisiko nangbate kamrangko ka•angna man•gnok ineba Skotong Minister parakataha.
MDA-II.0 sorkarini mongsonggipa kamrangko janapatengon, nambata sanna banani, nambata lekka porani aro chadamberangni dingtang dingtang nanganirang jekai, kam ka•e cha•ani cholrang aro uandakgipa kamrangna gisik on•bate kamko ka•anggen ine Pa Sangma parakataha.
Niam gri koela bikotaniko champengani bidingo sing•anina aganchakengon, a•bachengonin MDA sorkari, niam gri koela badinganiko champengna kam ka•aha, indaken, mikkangchi niam gri koela badinganiko champengna gita rakbate ja•kurangko de•anggen ineba Skotong Minister parakataha.
A•doko niam gita koela bikotani kamrangko a•bachengataha ineba Pa Sangma parakataha.
NPP-chi dilgipa gitcham MDA sorkariko, dingtang dingtang kamrangna BJP-ni matnanggiparangna janapatengon, dingtang dingtang dolrang nangrime sorkariko rikode dingtange chanchigiparang dongaia, indiba re•mikkanganio chinga saksa sakgipin aro dolsa dolgipin baksa meli nangrime sorkariko rikna jotton ka•gen ineba parakataha.