Shillong, Feb 21, 2023: Focus aro Focus plus scheme-ni ning•o game cha•giparangna on•gipa tangkarang gampilna nanggipa loan ba sroani ong•ja, indiba indin on•giparangsa ong•a. Iako re•baenggipa bilsirangoba dakangkugen ine NPP-ni Padot aro skotong minister Conrad K Sangma Sombar salo talataniko on•ataha.
Skotong Minister iako damgni biaprango election-na re•jomanio, chong•motan damsa Mawsynram aro damsa Mawthadraishan constituency-o NPP-ni candidate-rang Alvin K Sawkmie aro Biolinda L Nonglait-na bang•bata manderangni chakrimaniko man•na gita wenanio talatangaha.
Bang•bata manderangan ia scheme-ko ong•gija dake loan ba sroani ine aganenga, “Anga na•simangna aganenga, iade loan ong•ja. Ia tangkarangko chinga na•simangna indin dakchakaniko on•enga aro na•simang iako sorkarina chotpilna nangjawa” ine Conrad Sangma aganangaha.
“Re•baenggipa salrango aro bilsirango chinga sorkariko rikon, NPP indine tik ka•aha, chong•motan chinga Focus aro Focus plus program-ko ka•angkugen aro bilsiantian nokantina chinga namgnirangko on•gen, group account-rangna tangka 5000 aro sakprakni account-ona gong 5000-ko on•gen, chong•motan sakprakan bilsiprako tangka gong 10000-ko man•gen” ine aganangaha.
Iana chu•gimik tangka gong kror 450-ko bilsiprako lak 4 batgipa nokdangrangna Focus aro Focus plus program-ni ning•o chammaha ineba Conrad Sangma agandapataha.
Manderang tangka man•gnigipa tangkarangko maini a•sel man•jaengachim, uarangko tarigen aro Focus aro Focus plus scheme-ni ning•o uamangni man•gnirangko on•gen ineba ku•chakangaha.
Uni aganani gitade, game cha•giparangko dakchakaniara NPP-ni dilenggipa sorkarini miksongani ong•a aro iako mikkangchi bang•a bilsirangna ka•angkugen.
Mawthadraishan NPP candidate-ni gimin aganengon, uano susaenggipa candidate susana kragipa ong•a aro ua chadamberang aro me•chik dolrang baksa bakrimgipa ong•a. Uandaken ua constituency-ni neng•nikanirangko namen u•ia ine aganaha. Uni gimin manderangko una pu•onchina gitaba didiangaha.
“Chinga chadamberangna bidani bidingo nambata cholrangko ra•bagen aro an•seng-baljokaniko namdapatna krenge kam ka•gen, ” ineba aganangaha.
Ia apsan biapon uni pagipa sagi PA Sangma bilsi 30 mangna skang sildorengo bilonaha aro election-na wennaha ine gisik ra•ataniko on•ne, manderang NPP-na cholko on•genchimode, ua biapko stadium tarigen aro kal•chakram ong•atna pilak nanganirangko tarie on•gen ine Conrad Sangma aganaha.
“Chinga ianona na•simangko re•baenggipa mol•molna re•baha, an•ching ku•cholsan nangrime ia constituency-ko aro an•chingni a•dokko mikkangchina ra•angna”, ineba agandapangaha.
A•dok gimikon NPP-ni bilakaniko nikna man•enga, NPP party-san a•dokko mikkangchi ong•a ramaona ra•angna man•gen.
“Pilak kona noksikrangon, NPP-na chakrimaniko man•enga. Chinga sorkari riknasan man•aigen ong•ja, indiba susaanio bang•bate cheanirangko man•gen” ine ka•donganiko aganangaha.