Tura, February 21, 2023: West Garo Hills a•jani B-Mahal a•ako chel•chakna aro dakgrikna bikotgipa ‘Save B-Mahal Committee’ HQ Pedaldoba, Sixth Schedule-ni ning•o donggipa a•ararangko NPP-chi dilenggipa MDA sorkari aro GHADC melaprue, MIDC aro MTDC-na palahani gimin, North aro West Garo Hills nangrime tom•aniko ong•atenga, ine Save B-Mahal Committee-ni Chairman Rimjen Ch.Sangma parakataha.
“An•chingni B-Mahal a•a bangbang jakpasaba dongjani gisepon, hectare 5000 batpile, company-na palani aro Land Holding Certificate-ko bigha 2 nokdangprakna on•gen, ine songdonggiparangni kosako aro Sixth Schedule-ni niamko pe•an baksa B-Mahal-o songdonggipa manderangko Garo Hills-oniko chagalani ong•chongmotenga” ine Rimjen Sangma parakataha.
Uni gimin B-Mahalo songdonggipa sakantian an•tangtangni nokapna, bari-bagan-na Ambini bolpang, Atchu-ni ki•gongna sanalan baksa deritchu-su•ritchurangna nama kamko ka•e, B-Mahal-ni a•ana warachakna apsan jakpong goe, kitteng wa•su bile, February 23 tarik Butbar pringni 11 bajio Hatogaon field-o tom•e chanchirimgen ine u•iataha.
Uni gimin B-Mahalo songdonggipa pilakan tom•anio bakko ra•epachina mol•molataha.