Baghmara, October 20, 2022: Meghalaya A•dokni Skotong Minister Pa Conrad Sangma, Bristibar salo South Garo Hills a•jani game ge•e cha•gipa dolrangna jillanirangko aro chadambe dolrangna tangka paisarangko suale on•angaha.
Skotong Minister Pa Conrad Sangma, FOCUS+ni gita South Garo Hills a•jani ge-987 nokdangrangna gong lak 9 hajal 87 tangkarangko suale on•angaha. Unbaksana FOCUS+ni gita a•dokni bang•a game ge•e cha•giparang dakchakaniko man•aha.
Ia scheme-ni gita gong hajar 5 tangkarangko beneficiary-ni bank account-ona financial aid dake chipate on•rongenga.
Apsandaken Rural Backyard Piggery Scheme, PROGRESS-ni gitaba mang 1000 wakrangko (bima manggittam aro bipa mangsa)-ko sak 250 game ge•e cha•enggipa nokdangni manderangna suale on•angjolaha. Uasan ong•aigija sak 30 beneficiary-rangna Kroiler do•orangko suale on•angskaha.
PROGRESS Scheme-ni ning•o a•dok sorkari game ge•e cha•giparangna jillanirangko suale uamangna dakchakaniko on•enga. Ia scheme-ni gita a•dok sorkari, wak be•enrang aro do•o be•enrangko bariatna aro gipin biapchi watatna miksongenga.
Skotong Minister YESS Meghalaya-ni gitaba a•dok sorkari dol 11 chadamberangna lak 4 hajar 8 tangkarangko suale on•angaha. Ia scheme-ni gita a•dok sorkari chadamberangko ja•atangchi chadenge kamrangko ka•angna dakchakaniko on•angaha.
Tom•anio aganprakengon Pa Conrad Sangma, “Meghalaya a•dok damsa a•sal gnanggipa aro pattianian gapgipa a•dok ong•a. Uni gimin pilak man•gipa cholrangchi a•dokni manderangna dakchakanian, chingni miksongani ong•a. Batanggimin bilsi 4 ja 6-na chinga a•dokni manderangna rokomanti scheme-rangko ra•bae on•aha. Chinga mikkangchiba a•dokni manderangna dakchakangkugen aro a•songo nambatsranggipa dam 10 a•doko biming dongatna krenge kamrangko ka•anggen ” ineba aganangaha.