Williamnagar, June 29, 2022: East Garo Hills a•jani skotong songjinma Williamnagar, Chidekgre Higher Secondary Skulni Principal gitcham, Robinus T Sangma aro bang•a A•khing Nokmarang Sukrobar salo Janata Dal United Party-o napangaha ine parakataha.
Uamang Sukrobar salo Guwahati songjinmaona re•ange, JDU dolni National General Secretary Afaque A Khan, Senior Ukil-rang, aro NE a•jani JDU dolni President-rangni mikkango napangaha.
“Anga da•alo Janata Dal United (JDU) dol baksa chadengpae, re•baenggipa salrango uamang baksa nangrime kamrangko ka•anggen. Anga National General Secretary Afaque A Khan-ko North East a•dokni Convenor, Arunachal Pradesh, Nagaland, Manipur a•dokni State President, aro JDU dolni angko kusi ong•e rimchaksoani mittelpilna sika. Anga re•baenggipa 2023 bilsini eleksino JDU dolni gita susaanggen. Je manderangan JDU dolona napbana skengachim uamang pilakon chinga kusi ong•e rimchaksoa. Chinga darangkoba mikkang nitegija kakket ong•e kamko ka•angna ku•mitcheta. Janata Dal United Party Bihar a•doko sason ka•enggipa dol ong•a. JDU dolo sak 16 MP aro sak 5 Rajya Sabha-ni membor-rang donga. JDU dolko da•osa North East a•doko knachenga ine ong•ja, Arunachal Pradesh a•doko ia dolni MLA sak 7, Manipur-o sak 6 aro Nagaland-o sak 1 MLA-rang donga. Anga ka•donga aro bebe ra•a, JDU Meghalaya a•doko gipanggen aro sorkariko rikanggen. Chinga Meghalaya a•dokoba ta•raken Office Bearer-rangko seokanggen” ine Robinus T Sangma u•iataha.