Tura, November 25, 2022: John Leslee Sangma-ni agangipa kattarangko knaenba, BJP dolni gisepo ong•enggipa ma•sisretanirangko tale ma•sina gita man•aha. Indake mitam dolni dilgiparang BJP dolko ge•gni dake ma•ekna jotton ka•enga ine BJP Tura City District Committee-ni General Secretary Wilver Danggo parakataha.
John Leslee-ni agangipa katta, “Meghalaya BJP dolni Incharge Dr M Chuba Ao, uko BJP dolo napchina aganku•pattiaha” ine agangipa kattarang chongmot ong•ama ong•ja tale ra•na gita nanggen. Batanggimin salrango GHADC-ni gitcham CEM Benedik Marak, Bernard Marak-ko uni adviser ong•e kamko ka•na jechakaha. Benedik Marak, “Dr M Chuba Ao, Bernard Marak-ni palo Akki Sangma-kosa Adviser ong•e rakkina ge•etaha” ine aganaha. Dr Chuba Ao, Leslee-ko dolo rimnapna mol•molgenchimoba, ua darang mandekoba eleksino chakatna dolni ticketko on•gen ine ku•rachakjawa. Indiba John Leslee-ni u•iatani gitade, Dr Chuba Ao una ticket on•na ku•rachake, dolo napchina aganku•pattiaha ine aganskaaha.
“John Leslee-ni agangipa kattarang kakket ong•genchimode, BJP dolna namen kenbeani ong•a aro eleksino chegipa ong•janaba donga. Bernard N Marak-ko pattoko donmiting somoio dolni mitam ka•rimskarang kusi ong•e manianiko dakskaha. Ian dolko be•gruatna kam ka•anisan ong•aia. John Leslee-ko namnike uamang eleksino chakatna ticket on•genchimode, ian dilgiparangni dal•a gualani ong•aigen. RTI ka•e nie ma•siani gitade, John Leslee uni MLA ong•miting somoio, MLA scheme-rangko apsan mandenan changni chang on•taitaiaha aro ua project-rang bimang ong•jaha, indiba bangbango donggipa project-rangsan ong•aia. Uni a•selsa ua 2018 bilsio sirikaha. Ua an•tangko South Tura Elakka-ni MLA Candidate ine jinmana parakna skang, Tura City District Committee aro South Tura Mandal Committee-ni ka•rimskarang baksa tom•e chanchirimaniko dakchengna nanga inesa agana, jekon ua ma•sisretaha. Ua ma•mongni dilgiparang baksa agangolpogrike dolo napgenchimoba, ua an•tangko BJP South Tura Elakka-ni MLA Candidate ine jinmana parakna skang District Committee-ni membor-rang baksa agangolpogrikchengna nanggen. Ma•mong sorkari aro a•dok sorkariba dolni dongimin niam gitasa re•na nanga, uamang John Leslee-na dolni niamrangko talatangjahakon. Ua an•tangko candidate ine jinmana aganna maming bil dongja, maina dolni dilgiparangsa jinmana candidate-ko parakatna bil donga. Ua BJP dolni candidate ong•e eleksino susana sikbebegenchimode, ua an•tangni application-ko District Committee Office-ona re•bae on•nena gita man•a. Uni gimin, chinga District Committee-ni dilgiparang uko mikkangchi indakgipa gualaniko daktaijachina aro an•tangko BJP dolni candidate ine jinmana parake manderangko dilsretjachina mol•mola” ine BJP Tura City District Committee-ni General Secretary Wilver Danggo janapataha.