Shillong, December 14, 2022: A•dokni Skotong Minister Conrad Sangma, BJP dolni matnange agangipa kattarangko jegalataha.
BJP dol MDA sorkari baksa nangrime kamrangko ka•engon, BJP dolni aganani gitade, FOCUS aro FOCUS+ game ge•e cha•gipa nokdangni manderangna hajar 10 tangkarangko on•engachim, ua scheme-ko MDA sorkari vote-rangko man•nasa sanale bikotaha ine BJP matnangaha.
Conrad Sangma, BJP dolni matnanganina aganchakengon, “FOCUS aro FOCUS+ ia ge•gni scheme-rangchi, a•dok sorkari dakchakaniko on•na nangchongmotgipa kamko sokatenga. Dakchakaniko man•gipa manderangchi ia scheme-rangni bidingo sing•sandie nion, ia scheme-ni dakchakachi janggi tangani cholko tang•dotna man•aha. Chinga re•baenggipa eleksin-na miksonge, ia scheme-ko bikota ong•ode, chinga ia bilsisaon bikotgenchim, indiba ia FOCUS aro FOCUS+ scheme-ko chinga re•anggipa bilsion bikote dakchakaniko on•engaha” ine janapataha.
BJP dolni matnangani gitade, MDA sorkari ia scheme-na 1500 kror tangkarangko jakkalaha. Indiba Conrad Sangma, matnanganiko jegalatani gitade, BJP gong 400 kror tangkarangkosan jakkalaiaha.
“Chinga lak 4 hajar 50 nokdangni manderangna FOCUS aro FOCUS+ni gita dakchakanirangko sokatna kror 450 tangkarangko jakkalaona sokgen. Ia scheme-na bang•a fund-rangko chinga man•soaha. Uni gisepon BJP sorkarini MDA sorkariko matnange, gong 1500 kror tangkarangko jakkalanga ine agananiara ong•chongmotja” ine Skotong Minister Conrad Sangma talatdapaha.