Tura, July 8, 2022: Batanggimin 2014 bilsini November 8 tariko, Tura Women Pulis Station-o saksa King Victor Ch Marak jekon Tengchu ine manderang ma•sitokbatachim, ua an•tangni donggipa noko bilsi chu•sokgijagipa me•chik bi•sako til•ekdrae roaha ine koborko man•soaha.
Indake koborko man•soani bakan Tura Women Pulis Station-o Case No. 58(11)2014 Under Section (U/S) 376 (2) (i) IPC R/W Section 5 (m)/6 POCSO Act 2012-o pangchake mamlako segataha. Ia obostani bidingo sing•sandina Woman Pulis (WPSI) Gorerthy T Sangma-na pakwatataha.
Ia obostani bidingo WPSI, Gorerthy T Sangma, name sing•sandianiko dakenba 2017 bilsini August 1 tariko Chargesheet-ko on•aha. Indake Court-o Trial matchotani ja•mano, West Garo Hills a•jani Special Court- POCSO Judge uko Section 376 (2) IPC R/W Section 6 POCSO Act, 2012-o pangchake dos donga ine parakataha.
Indake Special Court, 2022 bilsini July 4 tariko, “Dos dakgipa King Victor Ch Marak-ko bilsi 10-na pattoko donata baksa tang gong hajar 40-ko dosni kri gamchina ge•etaha. Ua hajar 40-ko dongimin somoi gita gamna man•jaode, uni sastiko ja dokna ra•doatgen” ine u•iataha.