Bike cha•ue palgipa sak 17 manderangko SIT rim•a

0

Tura, July 8, 2022: Special Investigation Team (SIT) bol 45 cha•ugimin motor bike-rangko man•pilaha aro dos dakgipa sak 17 manderangko rim•aha ine West Garo Hills a•jani SP Vivekanand Singh Rathore koborna parakataha.

Special Investigation Team (SIT) salantio cha•uenggipa garirang aro bikerangko rim•na man•na gita pulis dolrangko bikotaha. SIT batanggimin bilsi 5-ni gisepo cha•uako man•gipa gari aro bike-rangko am•sandie man•ne on•pilanin uamangni kam ong•a ine u•iataha.

Indake sal brini gisepon, pulisrang bol 45 motor bike-rangko man•pilaha aro sak 17 manderang jemangan cha•uani, dakait dakani, cha•bokani aro uandake dingtang dingtang namgijagipa kamrango jak donggiparangko rim•aha.

Rim•a man•gipa sak 17 manderangoniko mobile phone ge 17 aro gipin bosturangko man•aha. Uamangoniko ra•sekgipa bosturangko nike, SIT Meghalaya a•dokonikosan ong•aija, indiba Assam a•dokni garirangkoba bang•en cha•uaha ine u•ina man•aha.

Indake Assam a•dokoniko cha•ue ra•bagipa garirangko aro bike-rangko, Meghalaya a•dokona ra•napbae Secondhand Dealer aro Garage Mechanic-rangni jakchi palatskaenga ineba u•iataha.

Gimagimin bikerangko man•pilanichi, Assam a•doko bike gimaani gimin register ka•giparangoni bike bol 6-ko man•pilaha aro Meghalaya a•doko resister ka•gipa bike bol 4-ko man•pilaha. Uasan ong•aigija cha•ugimin bike bol 11-ko Rajabala songoniko man•pilaha, Jengjal-oniko bike bol 12, Tura songjinmaoniko bol 2, Bongaigaon-oniko bike bol 7 aro bol 13 Dadenggre-oniko man•pilaha. Rim•a man•gipa sak 17 manderangoni sak 15 manderangde Meghalaya-ni aro sak 2-de Assam-oni ong•achim.

Sing•sandianiko dakon SIT dolni ka•rimskarang, “Da•ororo bang•a manderang second-hand bikerangko chu•onga gita document donggija brean baksana bike-tang baksa bodolenga. Uamang mitam bikerangko online portal jekai OLX aro Facebook-rang gita palenga” ine u•iataha.

Uni gimin second-hand bikerangko bodolgenchimode ba bregenchimode, chu•gimik lekkarangko sing•sandichengesa brena nanga ineba SIT mikkrakatangaha.

Leave A Reply

Your email address will not be published.