Tura, July 27, 2022: Tura songjinmani MDC Bernard Marak-ni ma•drang Chandmary Beat House-ni pulisrangna lekka sedoatenba, Bernard Marak-ko Tura songjinmaona tom•tome rimbachina mol•molangaha.
“Chinga Bernard Marak-ni nokdang aro ma•drang mahari Bernard Marak-ko Uttar Pradesh Hapur a•jaoni West Garo Hills a•jaona rimbaengon, uko tom•tome rimbaaniko nangnika. Batanggimin salrango uni janggiko bon•atna ka•mikkenatani kattarangko ua man•soaha, indake uko rimbamiting somoio una neng•nikaniko on•genchimode pulisrangni dos ong•gen. Uni gimin uni janggiko naljokate uko tom•tomao Tura-ona rimbapilna nanga” ine Bernard Marak-ni ma•drang, maharirang u•iataha.