Tura, May 26, 2022: Tura-ni BJP MDC Bernard N. Marak Skotong Minister Conrad Sangma-ko jera ra•susana ra•biataha.
“Anga, Conrad Sangma-ko jera ra•susana okamna sika, ua BJP sorkarini Assembly Building nok be•gruani bidingo CBI-chi enquiry ka•na dabianiko maini a•sel jechaka uko jinmana parake on•na nanga. BJP, MDA sorkari baksa man•gnina bakrimja, indiba corruption-ni bidingo ku•rang on•asa bakrima. BJP sorkari a•songni manderangna ka•sae kangal cholgrirangna nambata janggi tangani cholko on•na miksonge bang•a scheme-rangko on•atenga. Indiba ua Scheme-rangko a•dok sorkarini manderangsa cha•minnoke galenga. Da•alo BJP dol baksa bakrime kamko ka•enggipa NPP sorkarini tol•napachi kangal cholgrirangni tangka paisako oktangna jakkalenga. Chinga BJP dol uamangni guale dakgimin kamrangko namatpilchina somoiko on•aha, indiba uamang apsankon daktaipilaia. An•ching namgipa aro sason ka•na changgipa dilgipakosa nanga, jinmani tangkako an•tangni namgnina cha•minokgipa dilgipako nangja. Ma•mong sorkariko rikenggipa BJP dol Meghalaya a•dokna bang•a scheme-rangko on•atenga, indiba a•doko ua scheme-rangni bimang mingsaba gri. Skotong Minister Conrad Sangma an•tangni dolko NE gimikchi gipatna aro bilakatna jinmani tangkako jakkalsretaha” ine Bernard Marak matnangaha.
GHADC-o pangnan warachakgipa dol ine chanako man•gipa BJP MDC Bernard Marak, corruption-ni bidingo jera ra•na nangchongmotgen. Skotong Minister ia changoba jera ra•na jechakgenchimode, ua an•tangni kamko jinma ma•sina kengipasa ong•gen. Tangkachi mangmangde a•dokko sason ka•na man•jawa. Bang•a MLA-rangan an•tangtangni namgninasa rikbata, uamang elekkatangni manderangna maming ka•sachakani dongja. Skotong Minister jinmani tangkako jakkalsrete an•tangni namgnina jakkalaniko dontongna nanga. NPP sorkariko chalaienggipa manderang jera ra•anio bakko ra•na nangchongmotgen ine Bernard Marak dabiangaha.
A•dokni pilak manderangan Skotong Minister-ni namgija kamrangko u•ina aro ma•sina gita nangchongmota. Conrad Sangma maini a•sel CBI enquiry-ko ra•bana jechakengachim, uko jinmana aganprake on•na nanga. Chinga BJP dolni manderang corruption-ni bidingo campaign ka•aniko dontongjawa. Chinga Garo Hills-ni kona noksik pilakchin manderangna NPP dolni bang•a scheme-rangni tangkarangko jakkalsretaniko jinmana parakesa dongen. Kangal cholgrirangni mipal palsana neng•skime janggi tanganiko mikrontangchi nikpileba, ua an•tangni namgninasa ja•ku de•aia aro kangal cholgrini mipalko ra•sekdrae cha•aia. Jera ra•grikanio Skotong Minister re•bachongmotna nanga aro an•tangni kamko jinmana talate on•na nanga ineba Marak dabiangaha.