Tura, July 26, 2022: All Garo Hills Napak Chra Association (AGHNCA) July 25 tariko tanggittik Executive Meetingko Williamnagar-o ong•ate Tura-ni MDC Bernard Napak Marak aro uni Ma•gipani nokko raid ka•ani bidingo chanchirimaniko dakangaha.
Iani bidingo AGHNCA jinma chanchirime District Administration aro Pulis Department-ni kamko raken jegalataha.
“Bernard Marak-ni ma•gipa noktango saksan dongenga. Ua an•tangni ka•sagipa segipako adita bilsirangna skangan gimaataha. Indake uni nokko maming ge•eta ba warrant gri pulisrang skatang chadrapanira kraani ong•chongmotja. Ua buchuma mande indakgipa obostarangni gimin mamingkoba u•ipaja. Pulis uni nokchi walo re•ange raid ka•aniara ra•chakna amgijagipa kam ong•a. A•chik jat chengonin Matrilineal Society ong•a. A•chik me•asarang bia ka•ani ja•mano me•chikni nokchi re•anga. Indake Bernard Marak-ba jiktangni nokchi re•angaha. Uni gisepon Pulis Bernard ma•gipani nokko raid ka•aniara, ua noko dongenggipa Buchuma mandeni gisikko saknaatna miksonge kam ka•anisan ong•aia aro iako AGHNCA maming dakeba ra•chakna man•chongmotjawa” ine u•iataha.
Unbaksana Bernard Marak-ni bidingo raiko on•a court donga aro uko naljokatna administration aro pulis Department-ni jako ong•a. Court ia obostani bidingo maming raiko on•kuja, uni gimin darangba uni janggina uko ka•mikkenatna niam dongja ineba AGHNCA janapataha.