Balachanda-ni MDC Songkapara songona re•ange chi bananichi nosto ong•ako niea

Tura, June 23, 2022: West Garo Hills a•jani Selsella elakkani ning•o ga•akgipa Songkapara songona Balachanda elekka-ni MDC Agassi Marak adita salrangna mikka jimbee waani a•sel chi banna re•gipa songona Bristibar salo re•ange nieaha.

A•a rudapako man•ne adita ramarang nosto ong•ako man•aha, iani a•selo MDC Agassi Marak Songkapara songona ringo re•ange nirok sandianiko dakeaha. TMC dolni bang•a karimskarang chi bannani aro a•a rudape nosto ong•gipa biaprangchi re•ange nirok sandianiko dakenga ine koborna parakataha.

MDC Agassi Marak aro TMC dolni gipin dilgiparang Winson Koch aro Sushil Koch re•angpae nirok sandianiko dakangpaaha.

Chi bannako man•ne duko ga•akenggipa nokdangni manderangna dakchakanirangko on•eaha. Mikka wae chi bannani a•sel nok jamrang aro bang•a ge•a gamanirang nosto ong•aha. Ua Songkapara songni manderangna ring ge•sako donbaaha, jedakode uamang sorok man•kuja dipet ringko nanga kamrangna jakkalna man•gen ineba aganne donbaha.